60.000 euros para impulsar o deporte de base a través de dez clubs de Cedeira
O deporte local de Cedeira contará un ano máis cunha inxección de 60.000 euros en axudas municipais. A Xunta de Goberno Local aprobou a concesión das subvencións destinadas aos clubs e entidades deportivas do municipio, que permitirán financiar tanto actividades como a adquisición de bens inventariables.
As axudas distribúense mediante un sistema de concorrencia competitiva, polo que as entidades foron valoradas segundo criterios e puntuacións previamente establecidos. En total, dez clubs recibirán fondos para desenvolver as súas actividades, mentres que oito deles obterán ademais unha segunda achega destinada a investimentos.
O reparto busca cubrir diferentes modalidades deportivas presentes no municipio, desde o remo, a natación ou o mergullo ata o baloncesto, tenis, fútbol, baile, karate ou caza e pesca.
Así se reparte o financiamento
O Club de Remo Cedeira recibirá 6.497,60 euros para actividades e outros 2.624,06 euros para investimentos. O Club Natación Cedeira contará con 5.158,86 euros para actividades e 2.083,91 euros para bens inventariables.
No caso do Club de Buceo Cedeira, a axuda será de 2.475 euros para actividades e 905 euros para investimentos, mentres que o Cedeira Basket Club contará con 4.433,65 euros e 1.790,69 euros respectivamente.
O Cedeira Tenis Club recibirá 4.586,54 euros para actividades e 1.852,28 euros para investimentos. Pola súa banda, o Cedeira SD disporá de 5.733,17 euros para actividades e 2.315,35 euros para bens inventariables.
A relación complétase co Club de Baile Street Dance, con 4.854,09 euros para actividades; Discalzas SD, con 2.775 euros; a Escola Kárate Cedeira, con 4.280,77 euros para actividades e 1.729,79 euros para investimentos; e a Sociedad Caza y Pesca, que recibirá 4.204,32 euros e 1.698,92 euros para os dous conceptos.
120.000 euros entre deporte e tecido sociocultural
Os 60.000 euros destinados ás entidades deportivas forman parte dun programa municipal máis amplo. A convocatoria para asociacións do ámbito deportivo suma a mesma cantidade que a destinada este ano ás entidades socioculturais.
Deste xeito, o Concello reserva 120.000 euros a través das dúas convocatorias de concorrencia competitiva, ás que se engaden os convenios nominativos que mantén con diferentes asociacións e entidades do municipio.
O obxectivo municipal é contribuír ao funcionamento habitual das entidades e facilitar tamén que poidan afrontar investimentos necesarios para manter ou ampliar as súas actividades ao longo do ano.