60.000 euros para impulsar o tecido sociocultural de Cedeira a través de 24 asociacións
Un total de 24 entidades socioculturais beneficiaranse este ano de 60.000 euros en axudas municipais destinadas a financiar as súas actividades e investimentos. A Xunta de Goberno do Concello de Cedeira aprobou xa a distribución dos fondos, concedidos mediante un procedemento de concorrencia competitiva baseado en criterios obxectivos.
Do importe total, 45.000 euros repartiranse para o desenvolvemento de actividades, mentres que os 15.000 euros restantes corresponden á liña destinada a investimentos. Nesta última modalidade son 14 as asociacións que contarán con financiamento.
A relación de entidades beneficiarias abrangue asociacións veciñais, culturais e sociais, así como colectivos relacionados coa música, as persoas maiores, a diversidade funcional e diferentes tradicións e celebracións locais.
As cantidades concedidas para actividades sitúanse entre os 404,63 euros da Asociación Lugares Comúns e os 2.945,38 euros da AVV Santa María de Régoa. No caso dos investimentos, as contías chegan ata os 1.542,73 euros concedidos a esta última entidade.
Entre as asociacións beneficiarias están a Sociedade Artística Eixil, As Aturuxeiras, Discalzos polo Festival, Brincadeira Cedeira, Mulleres da Vila de Cedeira, Rondalla Cedeira, Arelar Asociación Diversidade Funcional, Asociación Cultural Buxainas, Cedeirart, Asociación de Acordeóns de Cedeira e diferentes asociacións veciñais das parroquias e lugares do municipio.
Aumentan os fondos desde 2023
A convocatoria forma parte do incremento que o Concello de Cedeira aplicou desde 2023 ás liñas de axudas en concorrencia competitiva para entidades socioculturais e clubs deportivos.
Cada unha destas convocatorias pasou de contar con 36.000 a 60.000 euros, o que supón un aumento de 24.000 euros por programa. As bases permiten financiar tanto actividades como investimentos das entidades.
Este ano, ademais, o Concello organizou unha sesión específica para facilitar ás asociacións a preparación e tramitación das solicitudes.
A convocatoria sociocultural deixa 24 entidades beneficiarias, unha das cifras máis elevadas dos últimos anos. Nas próximas semanas está previsto que o Goberno local aprobe tamén as axudas destinadas aos clubs deportivos, dotadas igualmente con 60.000 euros.