A Asociación de Veciños As Campeiras abre a inscrición para os obradoiros do curso 2026-2027
A Asociación de Veciños As Campeiras xa ten aberto o prazo de inscrición para os obradoiros correspondentes ao curso 2026-2027, cunha programación que combina actividades artesanais, culturais e deportivas.
As persoas interesadas poden formalizar a súa inscrición na tenda de Elicio ata o venres 25 de setembro. No mes de setembro, o establecemento atende de luns a venres entre as 7:00 e as 15:00 horas e os sábados de 10:00 a 13:30 horas.
Entre as propostas previstas figura o obradoiro de bordado, que se desenvolverá os luns de 16:00 a 19:30 horas. Tamén haberá clases de encaixe de bolillos con periodicidade quincenal, os xoves e venres de 16:00 a 20:00 horas.
A pandeireta contará con dous grupos, un para nenos e nenas os venres de 18:00 a 19:00 horas e outro para maiores os venres de 19:00 a 20:00 horas. Pola súa parte, o horario de pilates está aínda pendente de confirmar.
A oferta complétase con restauración de mobles, os luns de 17:00 a 20:00 horas, e talla de madeira, os xoves de 17:00 a 19:30 horas. Tamén se incorporan clases individuais de acordeón con Andrés Penabad, cun horario aínda por concretar.
Desde a asociación sinalan ademais que existe preferencia nas actividades con prazas limitadas para as persoas socias que estean inscritas no curso.