A Aula Municipal de Cerámica inicia o curso en Vilaboa, Valdoviño, con todas as prazas cubertas
Con todas as prazas cubertas, a Aula Municipal de Cerámica inauguraba onte á tarde o curso no local social de Vilaboa -radicado na antiga escola unitaria da parroquia-. A concelleira de Cultura, Tamara Sabín, achegábase ata as instalacións municipais para saudar ás alumnas e alumno participantes no que será o segundo curso do proxecto.
De novo, as clases celebraranse os xoves en Vilaboa, na aposta do Concello por descentralizar a actividade cultural nas diferentes parroquias da localidade. A artista local Martina Beceiro, con estudo en Porto do Cabo, en Vilarrube, será a encargada de guiar as sesións. A boa experiencia do pasado ano levou á maioría do alumnado a repetir, sumando novas inscricións desta volta ata completar as 13 prazas ofertadas.