A Autoridade Portuaria dá luz verde a unha nova liña de subministración na Terminal de Enerxía de Mugardos
A Autoridade Portuaria de Ferrol-San Cibrao deu o visto e prace á execución dunha nova liña de subministración eléctrica de 15 kV na Terminal de Enerxía de Mugardos, propiedade do grupo Reganosa. O consello de administración do organismo portuario aprobou a modificación non substancial da concesión, o que posibilita a realización das obras, que xa superaron o trámite coas autoridades de Industria.
A planta está a desenvolver un proxecto para implementar unha nova liña que lle subministre enerxía. Deste xeito, contará cunha alimentación eléctrica adicional, o que lle permitirá incrementar a robustez do seu sistema de subministración e manter a súa operación en distintos escenarios. O organismo que preside José Antonio Álvarez Vidal autoriza así a execución dos traballos que afectan á zona de servizo da Autoridade Portuaria. Neste caso, trátase da execución de 65 metros de canalización subterránea para subministración eléctrica e de modificacións na subestación da regasificadora.
Entre outros asuntos, na reunión do consello de administración tamén tomou posesión como vocal o novo capitán marítimo, César Pita, en substitución do seu antecesor, Ángel del Real, e renovouse a Patricio Erhardt como representante das organizacións empresariais.
Así mesmo, aprobouse o nomeamento dos novos membros do Consello de Navegación e Porto dos portos de interese xeral de Ferrol e San Cibrao, que estará presidido polo director da Autoridade Portuaria, José Ignacio Villar.