A Casa da Cultura de Neda estrena ventás e portas tras unha renovación de máis de 70.000 euros
A Casa da Cultura de Neda conta xa con novas ventás e portas exteriores tras rematar as obras de renovación integral do inmoble. A actuación, impulsada polo Concello, permitiu substituír a totalidade das carpinterías exteriores co obxectivo de mellorar a eficiencia enerxética dun edificio que concentra boa parte da oferta cultural e de lecer municipal.
O Concello investiu algo máis de 70.000 euros na intervención, que incluíu o cambio dun total de 25 ventás de diferentes tamaños, ademais das distintas portas exteriores do edificio.
As novas ventás están fabricadas en PVC e dispoñen de acristalamento con vidros laminares e baixo emisivos, unhas características que permitirán reducir as perdas enerxéticas e, polo tanto, o consumo eléctrico asociado á climatización do inmoble tanto durante o inverno como no verán.
Máis eficiencia e seguridade
Ademais do aforro enerxético, a renovación das ventás permitirá mellorar o illamento acústico da Casa da Cultura e incrementar a súa seguridade en caso de incendio.
Un dos cambios máis visibles produciuse na biblioteca, onde desapareceron as antigas reixas e se instalaron vidros laminares con propiedades anti-intrusión, mellorando tanto a estética do espazo como a súa protección.
A intervención supuxo tamén unha actualización da imaxe exterior do edificio, que conta con soto e tres andares e que aínda conservaba boa parte das fiestras orixinais.
Unha nova fase na renovación do edificio
As obras foron financiadas polo Concello con cargo aos fondos provinciais do POS 2025 da Deputación da Coruña e forman parte do proceso de renovación e posta a punto da Casa da Cultura de Neda.
Esta intervención dá continuidade aos traballos realizados o pasado ano, cando se completaron o cambio da cuberta, a mellora do salón de actos e a renovación do mobiliario da biblioteca.
O Concello prevé continuar coa rehabilitación do edificio ao longo de 2026. Entre as actuacións pendentes atópanse agora a rehabilitación do arquivo e o pintado das fachadas, dous proxectos que está previsto acometer durante este ano.