A compostaxe medra con 35 novos composteiros e unha illa comunitaria en Perlío
O Concello de Fene continúa avanzando na separación e tratamento dos residuos orgánicos coa posta en marcha dunha illa de compostaxe comunitaria nas vivendas do Castro, en Perlío. Esta actuación súmase á recente campaña municipal de distribución gratuíta de 35 composteiros individuais de 400 litros para fogares que dispoñan de horta ou parcela.
A nova instalación comunitaria ocupa unha parcela municipal acondicionada para este fin e dispón de tres módulos para depositar os biorresiduos, un caixón para o material estruturante e carteis informativos sobre o funcionamento do sistema. Os traballos incluíron tamén a adecuación do espazo e a instalación dunha acometida de auga.
A concelleira de Medio Ambiente, Cristina García, explicou que esta iniciativa ofrece unha alternativa ás familias que non dispoñen dunha parcela propia para instalar un composteiro individual. O obxectivo é separar a materia orgánica no lugar onde se produce e transformala en compost, reducindo así a cantidade de residuos que debe pasar polo sistema convencional de recollida e tratamento.
Seguimento e asesoramento ás familias usuarias
A illa contará co apoio de persoal de ASPANEPS formado en compostaxe, que se encargará de supervisar o proceso, incorporar o material estruturante e garantir o acondicionamento adecuado dos módulos. Ademais, prestará asistencia ás familias usuarias e resolverá as dúbidas que poidan xurdir.
García destacou que a implantación deste sistema require algo máis que instalar os composteiros, xa que resulta fundamental acompañar as persoas participantes, especialmente nas primeiras fases, para explicar que residuos se poden depositar e como se debe realizar o proceso.
A alcaldesa, Sandra Permuy, subliñou que a finalidade é ofrecer á veciñanza diferentes opcións para aproveitar a materia orgánica, adaptadas ás características de cada zona e tipo de vivenda. Tamén incidiu na importancia de facilitar información clara e asesoramento para que a cidadanía poida incorporar a compostaxe aos seus hábitos domésticos.
Dous modelos para reducir os residuos orgánicos
A estratexia municipal combina a compostaxe doméstica, destinada ás familias que poden xestionar os seus residuos nunha parcela propia, coa compostaxe comunitaria, que permite compartir unha instalación entre varios fogares.
No caso dos 35 composteiros individuais, a campaña inclúe dúas visitas: unha para a entrega do equipamento e outra de seguimento e resolución de dúbidas.
Un proxecto cofinanciado pola Unión Europea
A implantación destes sistemas conta co apoio da Consellería de Medio Ambiente e Cambio Climático, a través das axudas para actuacións locais destinadas a mellorar a ecoeficiencia na xestión dos residuos municipais.
O proxecto de compostaxe doméstica e comunitaria está cofinanciado pola Unión Europea no marco do programa Galicia FEDER 2021-2027, cunha taxa de financiamento do 60% do gasto elixible para 2026. O Concello dispón dunha axuda da Liña 3, destinada a ampliar a compostaxe en orixe, cun orzamento subvencionable de 18.691,39 euros.
Ademais, Fene obtivo financiamento da Liña 7 para un proxecto de dixitalización, cun custo subvencionable de 15.000 euros sobre un orzamento total de 17.908 euros. Esta actuación busca avanzar na implantación dunha taxa específica para a xestión dos residuos municipais e en sistemas de pagamento vinculados á cantidade de residuos xerados.