A folga xeral paraliza Navantia e os polígonos de Ferrolterra e enche as rúas de manifestacións
A folga xeral convocada este mércores, 11 de novembro, está a ter un amplo seguimento en Ferrol e na súa comarca, cunha importante paralización da actividade no sector naval, nos polígonos industriais e en distintos servizos. A xornada comezou durante a noite coa presenza de piquetes informativos nos principais centros de traballo e continúa con mobilizacións nas rúas, nunha convocatoria que pon o foco no encarecemento do custo da vida, nas dificultades para acceder a unha vivenda e na perda de poder adquisitivo da clase traballadora.
Un dos principais puntos de seguimento está a ser Navantia. Tanto o persoal dos estaleiros de Ferrol e Fene como os traballadores das empresas auxiliares secundaron maioritariamente o paro. A actividade nas instalacións atópase practicamente detida e unicamente están operativos os servizos mínimos vinculados a cuestións esenciais, como prevención e bombeiros. Os piquetes concentráronse diante da entrada principal da factoría ferrolá desde a quenda de noite e durante as primeiras horas da mañá. Segundo fontes sindicais, o seguimento no estaleiro foi practicamente total, malia que habitualmente acceden ás súas instalacións arredor de 5.000 persoas na quenda principal.
A paralización tamén se deixou notar nos polígonos industriais de Río do Pozo, en Narón, e Vilar do Colo, entre Fene e Cabanas. Os piquetes informativos percorreron estas áreas empresariais desde a madrugada e atoparon unha actividade moi reducida, con numerosas empresas pechadas. Durante a mañá, os grupos sindicais tamén tiñan previsto desprazarse ao polígono da Gándara para informar os traballadores e comprobar o seguimento do paro nas empresas e establecementos da zona.
Outro dos puntos de atención foi a contorna do centro comercial Alcampo, en Narón. Os piquetes desprazáronse ata alí arredor das nove da mañá, acompañados de presenza policial. Finalmente, o hipermercado non chegou a abrir as súas portas, nunha xornada marcada polo peche de boa parte dos establecementos e pola escasa actividade comercial.
Os efectos da folga tamén se están a notar nos servizos públicos. Na recollida de residuos, Urbaser traballa unicamente cos servizos mínimos establecidos, mentres que en Narón tampouco chegou a incorporarse a quenda nocturna do servizo de limpeza. O transporte funciona igualmente cos servizos mínimos decretados para a xornada. Na estación de autobuses de Ferrol rexistrouse unha actividade moi reducida: a primeira hora só saíron dous autocares con destino á Coruña, que habitualmente viaxan cunha ocupación moito maior e que nesta ocasión transportaron unicamente catro pasaxeiros.
Dúas manifestacións percorren Ferrol durante a mañá
A xornada de protesta tamén tivo o seu reflexo nas rúas do centro da cidade, con dúas manifestacións sindicais convocadas por separado. A primeira, organizada por CCOO e UGT, partiu ás 11:30 horas da praza de España e percorreu distintas vías do centro, entre elas as rúas María, Arce e Real, ata rematar na praza de Armas. A esta mobilización sumáronse outras organizacións sindicais e formacións políticas como Esquerda Unida e Ferrol en Común.
Media hora despois, ás 12:00 horas, estaba prevista a saída da marcha convocada pola CIG desde as inmediacións da súa sede na avenida de Esteiro. A mobilización conta tamén co respaldo da CGT e de formacións como o BNG. As dúas convocatorias desenvólvense de maneira independente, despois de que as centrais sindicais non conseguisen artellar unha única manifestación conxunta para esta xornada.
As reivindicacións da folga van máis alá das condicións laborais e sitúan a vivenda e o custo da vida no centro das protestas. Os sindicatos reclaman medidas para frear o encarecemento dos produtos básicos e dos alugueiros, recuperar o poder adquisitivo dos salarios, combater a precariedade e reforzar os servizos públicos. A convocatoria conta co respaldo de distintas organizacións sociais e colectivos que consideran que o acceso a unha vivenda digna se converteu nun dos principais problemas para a poboación traballadora.
Unha nova mobilización pola tarde
A actividade reivindicativa continuará ás 18:00 horas cunha nova manifestación convocada pola Plataforma Galega Vivenda Xa!, que partirá da praza Amada García, diante do edificio administrativo da Xunta. Esta protesta enmárcase nas mobilizacións organizadas en diferentes localidades galegas para reclamar solucións á emerxencia habitacional e denunciar as dificultades de acceso a unha vivenda.
A folga xeral do 11N, a primeira destas dimensións en máis dunha década, está a ter así unha presenza destacada en Ferrolterra, tanto nos centros de traballo como nas rúas. Os sindicatos valoraron positivamente o seguimento rexistrado durante as primeiras horas e destacan a paralización de sectores estratéxicos como o naval e a industria auxiliar. No conxunto da comarca, a xornada está a desenvolverse con normalidade e sen que se comunicasen incidentes graves.