A limpeza das praias de Ares contará este verán cunha achega de case 20.000 euros
As praias de Ares contarán cun reforzo para os traballos de limpeza durante a tempada de verán grazas a unha achega de 19.813,80 euros concedida pola Deputación da Coruña ao Concello. A subvención enmárcase no programa MA100, destinado a financiar actuacións de limpeza das praias marítimas dos municipios da provincia durante os meses de maior afluencia.
A contía permitirá apoiar os gastos derivados da contratación de persoal e dos traballos necesarios para manter en boas condicións os areais do municipio ao longo da tempada estival.
A conservación das praias cobra especial importancia en Ares durante os meses de verán, cando estes espazos reciben unha elevada afluencia de visitantes tanto do propio municipio como doutras localidades próximas. A súa localización, protexida en boa medida da acción do vento e da forza do mar, converte os areais nun dos principais atractivos turísticos da localidade.
Á presenza de bañistas súmase tamén a chegada de residuos transportados polas correntes mariñas. Esta combinación fai necesario manter unha limpeza periódica das praias para garantir unhas condicións axeitadas durante os meses de maior uso.
Desde o Concello destacan así a importancia desta financiación para poder afrontar os traballos de mantemento e limpeza dos areais, especialmente nunha época na que a presión sobre estes espazos aumenta polo incremento da afluencia de persoas.