A peixería do mercado da Magdalena reabre cunha imaxe renovada e dez postos de venda
A nave da peixería do mercado da Magdalena volveu abrir as súas portas tras unha profunda reforma que permitiu modernizar as instalacións e reorganizar completamente o espazo interior. A actuación dota ao mercado de dez postos de venda renovados e busca mellorar tanto as condicións de traballo dos profesionais como a experiencia de compra da clientela.
O tenente de alcalde de Ferrol, Javier Díaz Mosquera, visitou este martes as instalacións acompañado pola concelleira de Mercados, Maica García, e pola delegada territorial da Xunta en Ferrol, Martina Aneiros. Durante o percorrido, destacou que a renovación supón un novo paso na aposta pola modernización dos mercados municipais e pola promoción dos produtos de proximidade, especialmente do peixe e do marisco.
A reforma permitiu trasladar aos laterais os dous postos que anteriormente ocupaban as mesas centrais, unha reorganización que gaña espazo útil, facilita a circulación polo interior da nave e crea unha contorna máis ampla e accesible. Ademais, habilitáronse zonas de descanso con bancos para facer máis cómoda a visita das persoas usuarias.
As obras foron adxudicadas por un importe de 326.647,01 euros e contaron coa cofinanciación da Consellería de Emprego, Comercio e Emigración da Xunta de Galicia. Durante a visita, a delegada territorial, Martina Aneiros, puxo en valor a colaboración entre ambas administracións e destacou que esta actuación responde ao obxectivo de impulsar a modernización das prazas de abastos e reforzar o comercio de proximidade.
A seguinte fase para revitalizar o mercado pasará pola creación dun gastromercado. O Concello está a preparar os pregos administrativos para sacar a licitación este novo servizo, que permitirá aos clientes mercar peixe e marisco fresco nos postos da praza e consumilo cociñado no propio mercado, con espazos habilitados para a súa degustación. O obxectivo é converter a nave nun novo punto de encontro gastronómico e comercial que contribúa a dinamizar a actividade do mercado da Magdalena.