A velutina dispara a súa presenza este verán e obriga a extremar as precaucións en San Sadurniño
A elevada presenza da avespa asiática está a converter este verán nun dos máis complicados dos últimos anos nas comarcas próximas á costa. Ante esta situación, o Concello de San Sadurniño fai un chamamento á veciñanza para extremar as precaucións e lembra que, no caso de detectar un niño secundario, debe comunicarse ao teléfono 012 para proceder á súa retirada.
Segundo explica a Casa do Mel, entidade que xestiona o colmear didáctico da Cortiña, a presión da praga é especialmente intensa nesta época do ano. O seu presidente, Manuel Ferreira Rodríguez, sinala que as condicións meteorolóxicas da primavera favoreceron un importante desenvolvemento da especie. 'Este ano é tremendo. Veu unha primavera moi boa e a velutina desenvolveuse moito e agora estamos tendo unha presión tremenda', asegura.
Un dos aspectos que máis preocupa é a aparición de numerosos niños primarios no chan, unha circunstancia que incrementa o risco para as persoas que realizan traballos de limpeza, desbroce ou tarefas forestais, así como para quen transita por camiños e zonas de monte. Hai apenas uns días, unha persoa sufriu varias picadas nun monte de Naraío e tivo que ser atendida de urxencia no centro de saúde debido a unha reacción alérxica.
Desde a Casa do Mel lembran que o trampeo, moi recomendable durante a primavera para capturar raíñas fundadoras, ten agora unha eficacia moi limitada. As trampas poden servir para reducir a presenza de velutinas nas proximidades das vivendas, hortas ou xardíns, pero non permiten eliminar os niños, xa que nesta época do ano a maioría das capturas corresponden a obreiras.
Por este motivo, o Concello insiste en que a principal recomendación é evitar achegarse aos niños e extremar as precaucións durante os traballos agrícolas, forestais ou de mantemento da vexetación. No caso de localizar un niño secundario, debe comunicarse de inmediato ao 012 para que persoal de SEAGA proceda á súa retirada. San Sadurniño está adherido ao convenio marco subscrito entre a Xunta de Galicia e a Fegamp para prestar este servizo.
A situación preocupa especialmente ao sector apícola. Manuel Ferreira recomenda reforzar a protección das colmeas mediante a instalación de arpas eléctricas, protexer as entradas, retirar o mel canto antes e proporcionar alimentación suplementaria, especialmente con achegas de proteína que favorezan a cría de novas abellas de cara ao inverno. Tamén considera prioritario aplicar o tratamento contra a varroa unha vez finalizada a extracción do mel.
Á presión exercida pola avespa asiática súmase este ano a falta de recursos naturais provocada pola seca. 'Non só está influíndo a velutina, senón tamén a seca, de maneira que temos dous factores en contra', apunta o presidente da Casa do Mel.
Desde o Concello de San Sadurniño insisten en que a prevención, a comunicación rápida dos niños secundarios e a protección das colmeas son as ferramentas máis eficaces para reducir o impacto dunha praga que este verán está a rexistrar unha incidencia especialmente elevada.