A Xunta reserva 1,51 millóns para reformar o CPI de Atios, pero deixa fóra o instituto de Valdoviño
O proxecto de orzamentos da Xunta de Galicia para 2027 inclúe unha partida de 1,51 millóns de euros para a rehabilitación integral do CPI de Atios, unha actuación que o Concello leva anos reclamando. Porén, as contas autonómicas non contemplan a construción dun instituto no municipio, outra das principais demandas educativas do goberno local.
O alcalde, Alberto González, volveu solicitar unha reunión co conselleiro de Educación, Román Rodríguez, para trasladarlle as necesidades educativas da localidade. A petición cursouse tras coñecerse o contido do proxecto orzamentario.
Un investimento de 1,51 millóns para o CPI de Atios
O goberno local valora positivamente que a Xunta reserve fondos para unha intervención que leva anos reclamando. Entre as necesidades expostas figuran a mellora da envolvente térmica do edificio, coa renovación da cuberta, das fiestras e da caldeira.
Segundo o Concello, estas actuacións foron trasladadas en reiteradas ocasións a representantes da Consellería de Educación e á xefatura territorial. A partida prevista permitirá abordar a rehabilitación integral do inmoble, aínda que o executivo municipal considera que este investimento só responde a unha parte das demandas educativas da localidade.
O instituto, unha reivindicación pendente
O Concello insiste na necesidade de dotar o municipio dun instituto que inclúa unha oferta de Formación Profesional básica. A corporación municipal aprobou en abril de 2025 unha moción para reclamar esta infraestrutura, unha proposta que, segundo o goberno local, responde ao crecemento da poboación e ao incremento continuado da matrícula nos centros educativos.
O obxectivo é que a mocidade poida completar a súa formación non universitaria sen ter que desprazarse fóra do municipio. Por iso, o executivo local reclama que a Xunta incorpore esta actuación aos seus plans de investimento.
Petición de reunión coa Xunta
Alberto González agarda que o conselleiro de Educación atenda a súa solicitude de reunión ou, alternativamente, acepte o convite para visitar o municipio e coñecer de primeira man as súas necesidades educativas.
O Concello lembra que os orzamentos autonómicos de 2027 se atopan aínda en fase de tramitación parlamentaria, polo que considera que existe marxe para introducir modificacións e incluír a construción do instituto.