Aberta a inscripción nun curso gratuito para converterse en monitor de ocio e tempo libre en Cedeira
O Concello de Cedeira abriu o prazo de inscrición para participar nun curso gratuíto de monitor/a de ocio e tempo libre, unha formación que permitirá ás persoas que a completen obter o título de primeiro nivel recoñecido pola Xunta de Galicia.
A iniciativa desenvolverase do 9 de outubro ao 13 de decembro nas instalacións do CEIP Nicolás do Río. As clases terán lugar principalmente os venres pola tarde e durante xornadas completas de sábado e domingo.
Os venres, a formación impartirase entre as 15.30 e as 20.30 horas, mentres que os sábados haberá sesións de 09.00 a 14.00 horas e de 15.30 a 20.30 horas. Ademais, o programa inclúe cinco domingos de formación, concretamente os días 18 de outubro, 1 e 22 de novembro e 6 e 13 de decembro, tamén en horario de mañá e tarde.
O curso está regulado pola normativa galega en materia de Xuventude e a titulación obtida ao finalizar a formación é a esixida para exercer como monitor/a de ocio e tempo libre en diferentes actividades destinadas á infancia e á mocidade.
As persoas interesadas poden formalizar a súa inscrición a través da sede electrónica do Concello de Cedeira ou de maneira presencial no rexistro municipal. Para participar é necesario cubrir previamente o formulario habilitado pola administración local.
A formación forma parte das iniciativas impulsadas pola área de Promoción Económica de Cedeira para favorecer a inserción laboral e ampliar as posibilidades de acceso ao emprego. Dentro desta liña, o Concello xa promoveu anteriormente cursos relacionados co monitorado de tempo libre e co sector da hostalaría.
A administración local tamén colaborou coa asociación O Beco na posta en marcha dun programa de atención sociosanitaria a persoas dependentes en institucións sociais e impulsou diferentes accións formativas destinadas a facilitar o acceso aos certificados de lingua galega.
Con este novo curso, Cedeira aposta por ofrecer formación gratuíta vinculada a sectores nos que existe demanda de persoal cualificado, ao tempo que facilita ás persoas participantes a obtención dunha acreditación profesional recoñecida en Galicia.