Aloumiños chega a catro concellos de Ferrolterra para combater a soidade non desexada
O programa Aloumiños chega este ano a catro municipios de Ferrolterra, Eume e Ortegal coa finalidade de combater a soidade non desexada e reforzar o benestar emocional das persoas participantes. A iniciativa, impulsada pola Xunta a través do Sergas en colaboración co Colexio de Educadoras e Educadores Sociais de Galicia, está presente en Neda, San Sadurniño, Moeche e As Somozas.
A proposta está especialmente orientada ás persoas maiores e combina diferentes actividades destinadas a favorecer a participación social e a creación de vínculos entre a veciñanza. O programa inclúe camiñadas saudables, actividades de dinamización social en grupo, charlas e obradoiros, nos que se traballan cuestións como o envellecemento activo ou o recoñecemento das emocións relacionadas coa soidade.
O obxectivo é crear espazos de encontro nos que as persoas participantes poidan relacionarse, compartir experiencias e establecer novas redes de apoio. Deste xeito, Aloumiños busca previr o illamento social e favorecer que as persoas que viven situacións de soidade non desexada conten con acompañamento e recursos para mellorar o seu día a día.
Os centros de saúde tamén desempeñan un papel destacado no programa. A través deles preténdese identificar persoas que poidan estar atravesando situacións de soidade non desexada e achegarlles información sobre a iniciativa e sobre as posibilidades de participación.
A iniciativa está aliñada cos obxectivos da Estratexia de Saúde Mental do Sistema Nacional de Saúde e este ano esténdese a un total de 20 municipios galegos. Para o seu desenvolvemento, a Xunta conta con profesionais da educación social encargados de organizar e dinamizar as actividades nos diferentes concellos.
Moveneda reclama máis continuidade en Neda
A posta en marcha da nova edición en Neda tamén provocou unha petición por parte de Moveneda. A concelleira Neiva Tristão trasladoulle á delegada territorial da Xunta en Ferrol, Martina Aneiros, a necesidade de que o programa teña continuidade e non se limite a edicións puntuais.
Desde Moveneda consideran que o acompañamento social e emocional require tempo para consolidar os vínculos entre as persoas participantes e advirten de que as interrupcións poden obrigar a recuperar posteriormente relacións e dinámicas xa creadas.
A formación reclama á Xunta un financiamento estable para garantir a continuidade de Aloumiños. Como alternativa, propón que, se a Administración autonómica non mantén o programa, sexa o Concello de Neda quen tome o relevo con recursos propios.
Segundo Moveneda, manter a iniciativa durante seis meses suporía un custo aproximado de 3.000 euros. A formación asegura que xa trasladara esta posibilidade ao goberno local tras rematar a edición anterior, aínda que daquela a proposta non prosperou.
Moveneda anuncia que volverá levar a cuestión ás comisións municipais e ao pleno para buscar o apoio do resto dos grupos políticos.