As mariscadoras da ría de Cedeira trasladarán as súas reivindicacións á Xunta este xoves
As representantes das mariscadoras da ría de Cedeira reuniranse este xoves, 12 de novembro, coa directora xeral de Desenvolvemento Pesqueiro, María de los Ángeles Vázquez Suárez, para expoñerlle a grave situación que atravesa o colectivo pola falta de recurso nos bancos marisqueiros.
O encontro terá lugar en Santiago de Compostela e foi convocado polo departamento autonómico tras as reivindicacións trasladadas polas traballadoras, que reclaman medidas para recuperar os bancos da ría e garantir o futuro da actividade. Ademais, piden solucións inmediatas que permitan asegurar a viabilidade económica das mariscadoras mentres non se recupera a produtividade.
A reunión chega despois dun novo encontro de traballo celebrado este luns no Concello de Cedeira, no que participaron representantes dos gobernos municipais de Cedeira e Valdoviño e da Confraría de Pescadores. Ambas as administracións locais apoian as demandas do colectivo.
A crise dos bancos marisqueiros comezou en 2024 e, segundo se expuxo na reunión, foi empeorando desde entón, con recuperacións puntuais, ata chegar á situación actual, marcada pola ausencia de produtividade.
Na xuntanza participaron os alcaldes de Cedeira e Valdoviño, Pablo Diego Moreda Gil e Alberto González Fernández; a primeira tenente de alcalde de Cedeira, María Xosé Pernas Díaz; a concelleira Carmela Prieto; e representantes da Confraría, entre eles a presidenta da agrupación de mariscadoras, Susana Bellón, e o patrón maior, Ricardo Villar.
Á reunión deste xoves están convocadas as representantes das mariscadoras da ría de Cedeira e da Confraría de Pescadores.