As Somozas incorpora un novo punto de subministración de combustible para vehículos agrícolas
A parroquia de Recemel, nas Somozas, conta xa cunha nova instalación destinada á subministración de combustible para vehículos agrícolas. O proxecto foi promovido pola empresa Iván Tembrás SLU e contou cunha axuda pública de 125.554 euros a través do programa Leader, no marco do Plan Estratéxico da Política Agraria Común (Pepac) 2023-2027.
A instalación foi visitada esta semana pola delegada da Xunta de Galicia en Ferrol, Martina Aneiros, acompañada polo alcalde das Somozas, Juan Tembrás. Durante a visita puideron coñecer as características do proxecto e o funcionamento do novo punto de subministración.
O espazo permite abastecer de combustible aos vehículos agrícolas propios da empresa no exterior da nave, facilitando así as tarefas relacionadas coa actividade da explotación.
Unha infraestrutura adaptada aos vehículos agrícolas
Para poñer en marcha a instalación foi necesario construír unha explanada que facilita as manobras dos vehículos e permite realizar as operacións de subministración con maior comodidade.
O proxecto inclúe tamén un depósito de dobre corpo fabricado en aceiro e fibra, equipado cun sistema de detección de fugas, así como un surtidor con dúas mangueiras.
A actuación recibiu financiamento a través do GDR Seitura 22, que canaliza as axudas do programa Leader destinadas ao desenvolvemento de iniciativas no territorio rural.