As 'Xanelas do Nadal' volverán iluminar as parroquias de Ortigueira a partir do 1 de decembro
As fiestras das casas de Ortigueira volverán converterse nun calendario de advento colectivo co regreso das 'Xanelas do Nadal'. O Concello pon en marcha un ano máis esta iniciativa, que busca crear espazos de encontro entre a veciñanza durante as semanas previas ás festas e que, por terceiro ano consecutivo, estará aberta á participación das parroquias que queiran sumarse.
A proposta consiste en que cada participante decore e ilumine unha fiestra da súa vivenda e escolla un día para inaugurala. Nesa xornada, a persoa anfitrioa invita a achegarse a outros veciños para compartir unha bebida e algo de picar, na medida das posibilidades de cada fogar.
As xanelas iranse acendendo por números desde o 1 de decembro ata Noiteboa, completando así un calendario de advento repartido polo municipio. As asociacións, colectivos, comerciantes e comunidades de veciños tamén poden participar, e os centros sociais das parroquias que se incorporen servirán como puntos de reunión.
Como participar nas Xanelas do Nadal
As persoas interesadas poden anotarse ata o venres 27 de novembro. A inscrición realízase na Oficina de Turismo, de luns a sábado entre as 10:00 e as 14:00 horas, ou a través do teléfono 981 422 089.
O Concello lembra que se trata dun proxecto de carácter veciñal e sen finalidade relixiosa, polo que está aberto a calquera persoa, independentemente das súas crenzas. O obxectivo é favorecer a convivencia e a participación comunitaria arredor dunha proposta que leva a celebración do Nadal máis alá dos espazos habituais.