Cabanas prepara o Paseo Marítimo para o inverno con tarefas de poda e mantemento
O Concello de Cabanas iniciou esta semana os labores de poda das árbores situadas na contorna da mediana de aparcamento do Paseo Marítimo, na estrada da praia. A intervención pretende controlar a forma e as dimensións da vexetación, así como reducir a acumulación de follas durante o outono.
Segundo explica o goberno local, a retirada e o control das follas resultan importantes para evitar que os restos vexetais bloqueen os rexistros e as arquetas da rede de drenaxe. Esta situación, especialmente cando se producen choivas, pode dificultar a evacuación da auga e ocasionar asolagamentos.
As actuacións municipais inclúen tamén o mantemento dos bancos do Paseo Marítimo. Durante estes días, os operarios están a realizar tarefas de limpeza e aplicación dunha capa de verniz co obxectivo de mellorar a conservación do mobiliario urbano.
Con estes traballos, o Concello busca preparar tanto a vexetación como os elementos do paseo para afrontar as condicións propias dos meses de inverno, marcadas polas precipitacións e a humidade.