Medio ambiente | Infraestructuras

O pleno aproba por unanimidade a primeira fase dun proxecto que permitirá limpar, asegurar e facer máis accesible un complexo de gran valor histórico

As antigas baterías de Campelo Alto están máis preto de recuperar parte do seu aspecto e da súa función como patrimonio histórico de Valdoviño. O pleno municipal aprobou por unanimidade a primeira fase do proxecto de recuperación das baterías de defensa de Ferrolterra, un paso que permitirá iniciar a contratación das obras, financiadas integramente pola Deputación da Coruña.

Esta primeira intervención estará centrada, sobre todo, en facer accesible o complexo e frear o deterioro que afecta a varias das súas construcións. Os traballos incluirán a limpeza da vexetación e dos entullos, o tratamento de fachadas e interiores e a retirada de elementos que presenten risco de derrube. Tamén se delimitarán determinadas construcións e áreas de protección e instalaranse paneis informativos e de advertencia para facilitar a visita e mellorar a seguridade.

A actuación abranguerá distintos elementos da posición militar, entre eles as garitas de acceso, antigos edificios destinados a talleres e almacéns, os almacéns de munición, diferentes asentamentos de pezas antiaéreas, telémetros, o lavadoiro e a estación central telemétrica. Tamén se intervirá no edificio de servizo ao Posto de Mando e noutras construcións vinculadas ao complexo.

O proxecto parte dunha situación na que boa parte das instalacións permanecen practicamente ocultas pola vexetación, que dificulta mesmo identificar os antigos camiños e conexións entre os distintos elementos. Noutros puntos, o deterioro é maior e existen construcións que presentan risco para as persoas que se acheguen á zona. Os entullos, as pintadas e o mal estado dalgúns camiños completan un escenario que fai necesaria unha actuación de recuperación.

O interese de Campelo, con todo, vai moito máis alá do estado actual das instalacións. A posición forma parte do Plan de Artillado de 1926, deseñado para reforzar a defensa da costa de Ferrolterra fronte ás novas capacidades da artillería naval. O conxunto foi concibido para defender o golfo Ártabro ante un posible ataque contra a base naval.

As baterías foron quedando sen uso de maneira progresiva ao longo do século XX, ata que o complexo quedou desafectado polo Ministerio de Defensa en 1991. Durante décadas, a súa condición de terreos vinculados á defensa contribuíu ademais a preservar unha contorna natural pouco alterada. As propias características das instalacións, semisoterradas e adaptadas á paisaxe, favoreceron tamén esta integración no territorio.

Agora, o proxecto pretende dar os primeiros pasos para recuperar fisicamente este patrimonio militar e facelo máis comprensible e accesible para a cidadanía. A posición de Campelo mantén un importante potencial histórico e turístico, ao conservar a pegada dun sistema de defensa que formaba parte dun plan máis amplo para protexer a contorna da base naval de Ferrol.