Catro novas torretas LED mellorarán a iluminación do Parque Castelao ante os reiterados actos vandálicos
O Parque Castelao de Fene contará cun novo sistema de iluminación formado por catro torretas con proxectores LED de alta capacidade luminosa. O Concello acometerá esta renovación para mellorar a visibilidade nas distintas zonas do recinto e evitar os problemas que afectan ás luminarias actuais, expostas a reiterados actos vandálicos e roubos.
O sistema existente baséase en boa medida en puntos de luz instalados a nivel do chan, unha localización que facilita o acceso aos equipos e os converte en obxecto de danos e subtraccións. Estas incidencias dificultan o mantemento da instalación e provocan que o parque non sempre dispoña dunha iluminación adecuada.
A solución prevista pasa por elevar os puntos de luz mediante catro torretas con proxectores LED. Esta nova disposición permitirá ampliar a cobertura luminosa e dificultar o acceso aos elementos da instalación, co obxectivo de reducir a súa vulnerabilidade.
A alcaldesa, Sandra Permuy, sinalou que a actuación busca dar resposta a un problema que se repite no parque e que acaba afectando á iluminación de todo o espazo. Segundo explicou, a nova configuración permitirá distribuír mellor a luz e reducir a exposición dos equipos a posibles danos.
Unha iluminación máis eficiente
A incorporación de tecnoloxía LED tamén permitirá mellorar a eficiencia do sistema e adaptar a capacidade luminosa ás dimensións e características do Parque Castelao. A distribución das catro torretas estará pensada para conseguir unha cobertura máis homoxénea dos diferentes espazos e percorridos.
O concelleiro de Servizos, Adán Chao, destacou que a renovación pretende facilitar o uso do parque para o paseo e o lecer durante as horas de menor luz. Tamén incidiu na necesidade de cambiar a disposición dos elementos para evitar ter que repoñer continuamente as luminarias danadas.
O Concello aposta así por unha solución que combina unha maior cobertura lumínica cunha instalación menos accesible e, segundo o goberno local, máis resistente fronte ao vandalismo.