Coriscada pasa de 40 aeroxeradores a só catro para producir un 78,5 % máis de enerxía
O parque eólico Coriscada, situado nos municipios de Mañón e Ortigueira, iniciou o proceso de repotenciación cun ambicioso cambio tecnolóxico que permitirá reducir de 40 a catro os aeroxeradores da instalación e, ao mesmo tempo, aumentar a súa produción eléctrica nun 78,5 %.
Os traballos suporán un investimento de 36,3 millóns de euros e está previsto que rematen ao longo de 2027. A actuación contempla o desmontaxe dos 40 aeroxeradores instalados desde 1998, que suman actualmente 24 MW de potencia, para substituílos por catro máquinas de última xeración de 7 MW cada unha.
A potencia instalada ascenderá así a 28 MW, aínda que a evacuación da enerxía continuará limitada aos 24 MW actuais.
Menos máquinas e máis produción
A renovación permitirá modernizar por completo a instalación e mellorar a eficiencia e a seguridade da súa operación. Un dos principais efectos será o incremento da produción anual, que pasará dos actuais 47 GWh aos 83,9 GWh, o que representa un aumento do 78,5 %.
A actuación tamén reducirá de forma considerable o número de aeroxeradores visibles no territorio, ao substituír as 40 máquinas actuais por só catro de maior tamaño e capacidade.
Endesa prevé ademais dar unha segunda vida a parte dos equipos retirados. Algúns dos aeroxeradores serán empregados como pezas de reposto noutros parques da compañía ou poderán ser vendidos a terceiros para a súa reutilización. Os compoñentes que non poidan ser aproveitados serán revalorizados.
A empresa sinala tamén que se apostou por que a tecnoloxía das novas turbinas teña fabricación íntegra dentro da Unión Europea.
Formación e emprego local
Durante a execución do proxecto está prevista a participación de man de obra especializada, coa intención de favorecer a contratación de traballadores locais e de empresas galegas tanto durante as obras como posteriormente na fase de operación.
Endesa tamén colaborará cos concellos de Mañón e Ortigueira na organización de cursos de formación relacionados coa operación e o mantemento de parques de enerxías renovables.
A repotenciación conta cunha axuda máxima de 6,79 millóns de euros concedida polo Instituto para a Diversificación e Aforro da Enerxía (IDAE), no marco dos programas de repotenciación circular do Plan de Recuperación, Transformación e Resiliencia financiado pola Unión Europea a través de NextGenerationEU.
Os traballos son executados pola sociedade Sistemas Energéticos Mañón Ortigueira SA, participada nun 96 % por Endesa a través de Enel Green Power España e nun 4 % polo INEGA.
O calendario previsto establece que o parque entre na fase de probas a finais de 2027, coa previsión de alcanzar a súa plena operación en marzo de 2028.