Ferrol en Común reclama ao Goberno local unha ordenanza para poñer orde ao estacionamento de autocaravanas
A regulación do estacionamento de autocaravanas volve ao debate político en Ferrol. Ferrol en Común reclama ao Goberno local que dea prioridade á elaboración dunha ordenanza específica para regular a presenza de autocaravanas, caravanas e vehículos tipo camper no municipio.
A formación lembra que no Pleno celebrado en maio se aprobou por unanimidade desenvolver un marco de diálogo cos diferentes colectivos afectados e tomar como referencia a ordenanza tipo elaborada pola Federación Galega de Municipios e Provincias (Fegamp). O obxectivo era adaptar ese texto ás características de Ferrol e avanzar cara a unha normativa municipal propia.
Segundo Ferrol en Común, o Goberno local mostrou daquela a súa disposición a impulsar de maneira inmediata a ordenanza, pero considera que, cando a tempada estival se achega ao seu final, non se produciu ningún avance neste sentido.
A formación critica que o Executivo municipal non conseguise ata agora conciliar as diferentes sensibilidades existentes arredor deste asunto e considera que a falta dunha regulación estable contribuíu a incrementar a tensión durante este verán.
Un problema que se repite cada ano
Ferrol en Común sinala que a ausencia dunha ordenanza específica deixou como principal resposta municipal a instalación de sinalización en determinados puntos, sen que exista, ao seu xuízo, un marco normativo integral que permita ordenar o estacionamento destes vehículos.
A formación lembra ademais que a regulación do estacionamento de autocaravanas xa figuraba entre os obxectivos a curto prazo da Axenda Urbana 2030 de Ferrol, aprobada polo propio Goberno local.
Para Ferrol en Común, contar cunha normativa permitiría establecer criterios claros sobre os lugares nos que se pode estacionar, favorecer a rotación dos vehículos, garantir a seguridade e evitar problemas de convivencia co resto das persoas usuarias dos espazos públicos.
A formación tamén considera que unha regulación adecuada podería contribuír a aproveitar o potencial turístico das autocaravanas sen prexudicar o uso normal das vías e dos espazos públicos.
Reclaman recuperar e ampliar os espazos específicos
Ferrol en Común vincula a elaboración da ordenanza coa necesidade de ampliar e modernizar o espazo existente na Malata para este tipo de vehículos.
A formación sinala que a dispoñibilidade de novos terreos tras a transformación da zona permitiría estudar alternativas para incrementar a capacidade destinada ao estacionamento de autocaravanas e campers.
Ao mesmo tempo, reclama que se abra canto antes o diálogo cos colectivos implicados para abordar a situación desde diferentes perspectivas e evitar que as decisións se adopten unicamente cando aparece un conflito.
Defensa dos usuarios que cumpren as normas
A formación municipal considera especialmente preocupante que a falta de planificación termine xerando unha imaxe negativa de todo o colectivo de usuarios de autocaravanas.
Ferrol en Común subliña que a maioría destas persoas se comportan de maneira 'cívica e respectuosa' cos espazos naturais e co resto da cidadanía, polo que reclama diferenciar entre comportamentos incívicos concretos e o conxunto do turismo itinerante.
A formación considera que unha ordenanza permitiría precisamente establecer unhas regras claras para todas as partes, ordenar os usos dos espazos públicos e reducir os conflitos que se producen durante os meses de maior afluencia.
A petición chega así a poucas semanas do remate do verán, despois dun período no que o estacionamento de autocaravanas xerou un importante debate en Ferrol. Ferrol en Común insta agora o Goberno local a retomar o compromiso adquirido no Pleno e iniciar a elaboración dunha normativa que permita afrontar o problema con carácter estable e non únicamente como resposta ás situacións que se producen cada temporada estival.