Labacengos, en Moeche, celebrará o seu XXII aniversario cunha tarde solidaria e música
A Asociación Veciñal Labacengos celebrará o domingo 25 de outubro o seu XXII aniversario e a décima edición da Tarde Solidaria cunha xornada que combinará música e colaboración social. A actividade terá lugar a partir das 17.00 horas no Ventoeiro, en Labacengos.
O programa inclúe a actuación musical de "Vai Rañala Meu", unha proposta concedida a través da Rede Cultural da Deputación da Coruña. Ademais, as persoas asistentes poderán degustar chocolate con churros de balde.
A celebración terá tamén un compoñente solidario coa recollida de alimentos destinados ao Balrial Ferrol. A organización sinala que os produtos máis necesarios son leite, galletas, azucre, pratos preparados, cacao en po e cereais para nenos e maiores, aínda que serán benvidas outras achegas.
As persoas interesadas en participar poden anotarse ata o 18 de outubro no teléfono 606 729 038.
A iniciativa conta coa colaboración da Deputación da Coruña, o Concello de Moeche e o Xeoparque Cabo Ortegal.