Máis de 2.700 persoas visitaron a oficina de turismo de Neda durante este verán
A oficina de turismo de Neda pechou a tempada estival con máis de 2.700 persoas atendidas durante os meses de maior actividade turística. O punto de información, situado xunto ao albergue de peregrinos do Camiño Inglés, mantivo a súa actividade entre o 1 de xuño e o 30 de setembro, coincidindo coa tempada alta da ruta.
En total, os rexistros municipais contabilizan 2.726 visitantes durante o verán. Agosto foi o mes con maior afluencia, con máis de 927 persoas, seguido de setembro, que sumou 736 visitantes. Xullo rexistrou 546 consultas.
A localización da oficina fixo que a maior parte das persoas atendidas fosen peregrinos e peregrinas que percorrían o Camiño Inglés. De feito, arredor do 65 % decidiu finalizar en Neda a primeira etapa da ruta, o que tamén se reflectiu na ocupación do albergue público situado xunto á oficina de turismo.
O albergue acolleu 1.770 peregrinos
Durante os meses de verán, o albergue de Neda recibiu 1.770 hóspedes e chegou a completar a súa capacidade en varias ocasións, especialmente durante o mes de agosto.
O establecemento volveu ter un papel destacado na ruta de peregrinación, especialmente despois do peche temporal do albergue de Ferrol durante o mes de agosto.
Para manter aberta a oficina todos os días durante a tempada alta, o Concello contou un ano máis coa colaboración da Deputación da Coruña, que permitiu incorporar persoal especializado en información turística. Ademais das tarefas propias da oficina, este servizo tamén asumiu a coordinación do albergue.
Visitantes de máis de 60 nacionalidades
O punto de información turística recibiu persoas procedentes de máis de 60 nacionalidades. As visitas de procedencia española representaron o 44,8 % do total.
Entre os visitantes nacionais destacaron especialmente os procedentes de Madrid, Cataluña e Andalucía, que superaron en número aos peregrinos chegados desde Galicia.
No ámbito internacional, os italianos foron os visitantes máis numerosos, con 432 persoas rexistradas durante a tempada.
As consultas realizadas na oficina estiveron relacionadas principalmente co propio Camiño Inglés, desde as distancias entre etapas ata os horarios dos albergues. Tamén houbo interese polos recursos turísticos de Neda, entre eles a fervenza e o miradoiro de Ancos, así como por cuestións relacionadas cos servizos dispoñibles no municipio.
Outro dos elementos que espertou a curiosidade dos visitantes foi o pan de Neda, sobre o que moitos peregrinos solicitaron información e mostraron interese por probar durante a súa estancia na localidade.
Con outubro, o Concello de Neda deu por rematada a tempada turística da oficina, que volverá abrir de cara á próxima campaña estival.