Neda destinará preto de 85.000 euros a renovar o camiño de Balbís e A Buhída
O camiño de Balbís e A Buhída será sometido a unha renovación integral para mellorar as condicións dunha vía de 604 metros que actualmente presenta un importante deterioro. A actuación, que contará cun investimento de preto de 85.000 euros, foi aprobada este luns polo Pleno de Neda dentro do paquete de obras financiadas cos fondos adicionais do Plan Único (POS+ 2026).
A intervención centrarase no camiño de Balbís e A Buhída, unha vía de 604 metros que presenta actualmente un estado de conservación deficiente e que dá acceso a varios núcleos cunha importante presenza de poboación. O Concello prevé investir nela preto de 85.000 euros para renovar o firme e mellorar tanto a seguridade dos peóns como a circulación dos vehículos.
Os traballos incluirán a limpeza das cunetas, o rebacheo dos puntos máis danados e a aplicación dunha nova capa de aglomerado en quente. Ademais, nalgúns tramos ampliarase o ancho da vía aproveitando as faixas de cesión das fincas edificadas.
O proxecto tamén contempla o entubado dunha profunda cuneta de terra existente na actualidade, unha actuación que permitirá gañar espazo útil na vía e mellorar as condicións de circulación.
O mal estado actual do camiño está relacionado tanto co uso como coas diferentes obras executadas nos últimos anos para a substitución de conducións de saneamento e gas e a conexión de numerosos servizos ás redes existentes.
O paquete de investimentos aprobado polo Pleno inclúe outras actuacións. Entre elas figura a pavimentación da rúa Xeneral Morgado, cunha partida de 51.131 euros, así como a renovación da iluminación do paseo marítimo, que contará con 35.500 euros.
Tamén se realizarán pequenas actuacións de mellora na contorna da pista polideportiva do Roxal. Todas estas intervencións quedan así incorporadas ao POS+ adicional 2/2026, co que o Concello pretende avanzar na mellora de diferentes espazos e infraestruturas do municipio.