O Auditorio Municipal de Cedeira estrea chan no escenario tras anos de intensa actividade cultural
O escenario do Auditorio Municipal de Cedeira está a ser renovado cun novo chan de madeira para mellorar as instalacións dun dos principais espazos culturais da vila. O Concello destinou 7.973,90 euros a unha actuación que xa está en marcha e que está sendo executada pola empresa local Muebles e Carpintería García.
A intervención responde ao desgaste acumulado polo intenso uso que soporta o auditorio ao longo do ano. O recinto acolle de maneira habitual actividades organizadas polas asociacións locais, ademais de festivais, representacións teatrais, concertos, sesións de cine, presentacións de libros e espectáculos dirixidos a públicos de diferentes idades.
O espazo tamén é escenario cada verán dun festival de ópera, polo que a actividade cultural que concentra ao longo do ano provoca un desgaste progresivo das instalacións.
Segundo a previsión municipal, os traballos estarán finalizados ao longo do vindeiro mes de outubro. A renovación permitirá afrontar a nova tempada cultural cun escenario en mellores condicións e ofrecer ás asociacións e á veciñanza un espazo axeitado para desenvolver as súas actividades.
A actuación forma parte do mantemento das instalacións municipais destinadas á cultura, cun investimento que busca prolongar a vida útil do Auditorio Municipal e garantir que continúe sendo un punto de encontro para a actividade cultural de Cedeira.