O BNG celebra a suspensión do desafiuzamento dunha familia de Narón e reclama un alugueiro social permanente
O Bloque Nacionalista Galego valora positivamente a decisión do Tribunal de Instancia de Ferrol de suspender o lanzamento e desafiuzamento dunha familia de Narón, previsto inicialmente para este venres 23 de outubro na vivenda da praza do Asilo. A paralización prodúcese despois de que a Sareb solicitase un prazo para materializar un expediente de alugueiro social, ao abeiro do acordo entre ambas as partes e recoñecendo a situación de vulnerabilidade recollida polos servizos sociais.
Desde a organización nacionalista sinalan que esta decisión é resultado da solidariedade veciñal, do traballo dos colectivos sociais en defensa do dereito á vivenda e da recente visita a Narón do deputado do BNG no Congreso, Néstor Rego.
Rego trasladara o apoio da formación á familia afectada e denunciara a situación que ameazaba con deixar sen fogar persoas en situación de vulnerabilidade. Ademais, reclamara a implicación efectiva das administracións e das entidades financeiras propietarias de grandes carteiras de vivenda, ao tempo que mantivo reunións coas partes implicadas e cos responsables dos activos da Sareb.
O BNG reclama un alugueiro social estable
A formación nacionalista mantén unha posición de prudencia ante a suspensión, pero adianta que fará un seguimento estrito do prazo concedido. O BNG esixe tanto á Sareb como a Servihabitat que cumpran os seus compromisos e convertan esta paralización temporal nun contrato de alugueiro social estable e adaptado aos ingresos reais da familia.
A organización lembra que considera a vivenda un dereito fundamental e non un negocio mercantil, e reclama unha solución que garanta a estabilidade residencial das persoas afectadas.
A familia tiña un contrato de alugueiro ata 2030
Segundo explica o BNG, a familia pagou sempre o alugueiro a unha empresa coa que tiña un contrato vixente ata 2030. Porén, en xaneiro deste ano recibiu unha carta da Sareb na que se reclamaba a vivenda.
A formación nacionalista apunta tamén que outras persoas inquilinas da praza do Asilo levan anos afrontando situacións semellantes, con contratos que, segundo denuncia, poderían ser fraudulentos.