O BNG presentará en Caranza a candidatura de Món Fernández á Alcaldía de Ferrol
O BNG de Ferrol celebrará o vindeiro 8 de outubro un acto público para presentar a candidatura de Món Fernández á Alcaldía de Ferrol de cara ás próximas eleccións municipais, previstas para maio.
O encontro terá lugar ás 20.00 horas no Centro Cívico de Caranza e contará coa participación da portavoz nacional do BNG, Ana Pontón, así como do actual portavoz municipal da formación, Iván Rivas, e de Mariña Bello.
Durante o acto, Món Fernández dará a coñecer a súa candidatura e as principais liñas do proxecto que o BNG pretende desenvolver na cidade.
Desde a formación nacionalista defenden a necesidade de que Ferrol conte cunha 'voz propia', centrada, segundo sinalan, na defensa dos intereses da cidade. O BNG sitúa tamén entre os seus obxectivos recuperar o papel de Ferrol como cabeceira da comarca.
A formación considera que a cidade precisa un cambio e aposta por situar no centro da política municipal as persoas e as entidades que desenvolven a súa actividade diaria en Ferrol.
O BNG fai un chamamento á veciñanza para asistir ao acto e coñecer tanto a Món Fernández como o proxecto que a formación presentará de cara ás próximas eleccións municipais.