O BNG reclama un plan para recuperar a actividade do mercado municipal de Pontedeume
O BNG de Pontedeume reclama un cambio de rumbo na xestión do mercado municipal para evitar que siga perdendo actividade e aproveitar o seu potencial como motor do comercio local. A formación nacionalista propón unha estratexia que combine a incorporación de novos comerciantes, a organización de actividades durante todo o ano e unha maior conexión co feirón.
A proposta parte da situación dos postos que continúan baleiros. Segundo expón o BNG, na última licitación municipal ofertáronse sete espazos e unicamente se cubriu o destinado a cafetería. Posteriormente, tras modificarse o procedemento para permitir a adxudicación directa, só se tería conseguido ocupar outro posto.
A falta de persoas interesadas en varios destes espazos xa quedara reflectida nas convocatorias municipais. En agosto de 2026, o Concello abriu un novo procedemento para adxudicar directamente os postos que seguían libres, despois de que seis dos sete espazos incluídos nunha licitación anterior quedasen desertos. Entre eles figuraban dous postos de carnicería, tres destinados a produtos locais e de proximidade e outro para produtos ecolóxicos.
Ante esta situación, o BNG considera necesario ir máis alá das convocatorias para ocupar os espazos e desenvolver unha estratexia que consiga atraer actividade de forma estable. Entre as súas propostas figura buscar activamente novos produtores e comerciantes, ademais de manter un diálogo permanente coas praceiras e os praceiros para coñecer as súas necesidades e mellorar o funcionamento do recinto.
Máis conexión entre o mercado e o feirón
A formación tamén propón organizar actividades e eventos ao longo de todo o ano para atraer visitantes e darlle máis vida ao mercado. A esta iniciativa engade a rehabilitación do feirón e o reforzo da súa conexión co mercado municipal, co obxectivo de que ambos os espazos se complementen e contribúan conxuntamente a dinamizar a economía de Pontedeume.
O BNG critica a falta de planificación do goberno local e advirte de que a perda de postos pode poñer en risco o futuro dun equipamento que recibiu en 2023 o distintivo de 'Mercado Excelente' da Xunta de Galicia, un recoñecemento ás reformas realizadas e ao seu papel no impulso do comercio de proximidade.
A formación nacionalista defende que o mercado municipal e o feirón deben funcionar como dúas pezas fundamentais da economía local e reclama medidas para convertelos en espazos activos, cunha oferta comercial atractiva e capacidade para xerar actividade durante todo o ano.