O BNG reclama unha nova licitación dos autobuses ante a falta de prazas entre Ferrol e A Coruña
O BNG reclama unha nova licitación do transporte público por autobús en Galicia para adaptar o servizo á demanda real e evitar que as persoas usuarias queden sen praza. A formación nacionalista trasladou estas reivindicacións este domingo nunha campaña informativa na estación de autobuses de Ferrol, na que tamén deu a coñecer as respostas da Xunta ás preguntas formuladas polo deputado Mon Fernández no Parlamento galego.
O parlamentario e candidato do BNG á Alcaldía de Ferrol criticou que o conselleiro de Transportes, Diego Calvo, e a directora xeral de Mobilidade, Judit Fontela, comparen o servizo de autobuses coas viaxes en avión para xustificar que non sempre haxa billetes suficientes. “O transporte en autobús está dirixido a atender as demandas diarias máis básicas da poboación, ensino, traballo, centros hospitalarios”, afirmou Fernández, que acusou a Xunta de antepoñer os intereses de Monbus á solución dos problemas do servizo.
Segundo os datos facilitados polo Goberno galego, só na liña entre Ferrol e A Coruña foi necesario habilitar 780 servizos de reforzo durante o mes de setembro. Para o BNG, estas cifras evidencian que o servizo está mal dimensionado e que os reforzos non abondan para cubrir as necesidades. A formación denuncia que aínda hai persoas que quedan sen subir aos autobuses e que as esperas poden provocar atrasos nos desprazamentos.
O partido tamén advertiu das consecuencias da falta de conexións para os colectivos máis vulnerables, especialmente as persoas con diversidade funcional, que poden atopar no transporte unha barreira para acceder ao emprego. A situación afecta igualmente ao alumnado que precisa desprazarse a centros de ensino non obrigatorio. “Nós precisamos autobuses, non avións”, concluíu Fernández, que defendeu o transporte público como un servizo esencial para garantir dereitos básicos.