O Centro de Día de Caranza mellorará a súa accesibilidade cun investimento de máis de 41.000 euros
O Centro de Día de Maiores de Caranza, en Ferrol, está a ser obxecto dunha nova actuación de mellora destinada a incrementar a accesibilidade e a funcionalidade das súas instalacións. As obras, financiadas pola Xunta de Galicia con fondos europeos do Mecanismo de Recuperación e Resiliencia (MRR), supoñen un investimento de 41.243,68 euros.
O tenente de alcalde de Ferrol, Javier Díaz Mosquera, visitou este xoves os traballos acompañado polo xerente do Consorcio Galego de Servizos de Igualdade e Benestar, Perfecto Rodríguez, e pola delegada territorial da Xunta en Ferrol, Martina Aneiros.
Durante a visita, Díaz Mosquera destacou a implicación da administración autonómica na mellora das infraestruturas sociais da cidade. Segundo sinalou, este investimento contribuirá a ofrecer unhas instalacións máis cómodas, accesibles e adaptadas ás necesidades das persoas usuarias.
As actuacións céntranse na renovación de diferentes espazos interiores do edificio e no acondicionamento da contorna exterior, co obxectivo de mellorar tanto a funcionalidade como a seguridade do centro.
Pola súa banda, o xerente do Consorcio Galego de Servizos de Igualdade e Benestar lembrou que Ferrol conta actualmente con 75 prazas públicas de centro de día, un recurso que presta atención especializada ás persoas maiores e ás súas familias.
Esta actuación forma parte do plan de investimentos que a Xunta está a desenvolver nos centros públicos dependentes do Consorcio Galego de Servizos de Igualdade e Benestar, financiado con fondos europeos. Nos últimos anos o centro de día de Caranza xa foi obxecto doutras intervencións, como a impermeabilización da cuberta, a reforma dos aseos da planta baixa e a posta en funcionamento dun ascensor, co obxectivo de modernizar as instalacións e mellorar a calidade da atención prestada.