O CHUF incorporará novo equipamento de última xeración para o seu laboratorio de Microbioloxía cun investimento de 1,4 millóns de euros
O Complexo Hospitalario Universitario de Ferrol (CHUF) renovará o equipamento do seu laboratorio de Microbioloxía grazas a un investimento de 1,4 millóns de euros da Xunta de Galicia. A actuación permitirá incorporar tecnoloxía de última xeración para automatizar parte dos procesos de análise e mellorar a capacidade diagnóstica do servizo.
O contrato, impulsado polo Servizo Galego de Saúde (Sergas), inclúe o subministro de material funxible e o arrendamento e mantemento dos novos equipos durante un período inicial de 36 meses, con posibilidade de prórroga por outros 24. Neste caso, o valor estimado da contratación ascendería a máis de 2 millóns de euros.
Entre as principais novidades figura a renovación dos equipos empregados para realizar antibiogramas, fundamentais para determinar a sensibilidade das bacterias aos antibióticos. Tamén se actualizarán os sistemas de identificación bacteriana mediante espectrometría de masas, capaces de analizar varias mostras de forma simultánea, así como o equipamento destinado á tinguidura de Gram, cunha tecnoloxía máis eficiente e que reduce o consumo de reactivos.
O laboratorio incorporará ademais unha nova sementadora automática de mostras, unha ferramenta que permitirá mecanizar unha das tarefas máis repetitivas do servizo. Para a súa instalación executarase unha pequena obra de adaptación nas dependencias do laboratorio.
O xefe do Servizo de Microbioloxía, Andrés Agulla, destacou que esta renovación permitirá contar coa última xeración de equipamento e liberar aos técnicos das tarefas máis mecánicas, facilitando que poidan asumir novas funcións e ampliar a carteira de servizos que ofrece o hospital.
O laboratorio realiza cada mes entre 7.000 e 8.000 probas de bacterioloxía para detectar infeccións, principalmente en mostras de ouriños e feridas. A nova tecnoloxía permitirá acelerar a identificación das bacterias e seleccionar con maior rapidez o tratamento antibiótico máis axeitado para cada paciente.
Segundo explicou Agulla, o investimento non só supón un incremento da capacidade do servizo, senón tamén un importante avance na complexidade das determinacións que poden realizarse. Isto permitirá ofrecer aos pacientes da Área Sanitaria de Ferrol os mesmos recursos tecnolóxicos dispoñibles nos grandes hospitais.
O Laboratorio de Microbioloxía, situado no Hospital Naval, experimentou unha importante modernización nos últimos anos. Ademais do diagnóstico de infeccións bacterianas, realiza estudos virolóxicos relacionados con enfermidades como o VIH, as hepatites, o virus do papiloma humano, a gripe ou a covid, así como análises específicas para a tuberculose e probas de bioloxía molecular.
O servizo permanece operativo as 24 horas do día durante todo o ano e está integrado por unha trintena de profesionais entre facultativos, técnicos de laboratorio, persoal de enfermaría e auxiliares administrativas. Ademais, desde 2021 está acreditado para a formación de médicos internos residentes e conta coa certificación da norma ISO desde 2012.