O Club Natación Cedeira busca apoio provincial para manter a súa actividade durante as obras da piscina
O Club Natación Cedeira podería contar con apoio económico da Deputación da Coruña para manter a súa actividade federada mentres permaneza pechada a piscina municipal polas obras de ampliación. O pleno do Concello aprobou este luns, en sesión extraordinaria e coa maioría absoluta do grupo de goberno, solicitar unha subvención nominativa á administración provincial para financiar un proxecto deportivo dun ano de duración, cun orzamento total de 48.780 euros.
A proposta municipal busca garantir a continuidade dos adestramentos e da participación en competicións oficiais das seccións de natación e triatlón da entidade. Desde o peche das instalacións municipais, os deportistas teñen que desprazarse diariamente ata Cariño para utilizar a piscina dese concello, unha situación que está a supoñer un esforzo organizativo e económico para o club.
A memoria xustificativa elaborada pola Alcaldía sinala que esta situación tamén provocou baixas de deportistas e unha conseguinte redución dos ingresos da entidade. O Concello considera que a continuidade do proxecto deportivo ten interese público polos seus efectos no ámbito deportivo, social e económico, e por iso pretende que a Deputación asuma a maior parte do financiamento.
En concreto, a axuda provincial solicitada ascendería a 39.024 euros, o equivalente ao 80% do custo total. O 20% restante, 9.756 euros, sería achegado polo Concello de Cedeira.
Adestramentos en Cariño e participación en competicións
O proxecto, que se estendería ata o terceiro trimestre de 2027, contempla os gastos necesarios para manter a actividade habitual do Club Natación Cedeira. Entre eles figuran os salarios e as cotizacións do persoal adestrador, o aluguer e os gastos dunha furgoneta para os desprazamentos ata Cariño e o pagamento polo uso da piscina nesa localidade.
A proposta inclúe tamén os custos das viaxes a competicións oficiais, as licenzas deportivas, os servizos de xestoría e a adquisición de material deportivo non inventariable. Ademais, prevé financiar a organización de dúas competicións deportivas en Cedeira, co obxectivo de manter a presenza da entidade na actividade competitiva e deportiva local durante o período de obras.
A aprobación plenaria permite ao Concello iniciar a solicitude formal da subvención, pero a concesión dos fondos queda agora pendente da decisión da Deputación da Coruña.