O notario máis novo de España ofrecerá este xoves unha charla gratuíta en Valdoviño
Os testamentos, as herdanzas en vida, as bonificacións fiscais e os trámites relacionados coas propiedades serán algúns dos temas que centrará a charla que Fernando Frías Fontes ofrecerá este xoves, 12 de novembro, en Valdoviño. O encontro terá lugar ás 19:30 horas no auditorio da Casa da Cultura, con entrada libre e gratuíta ata completar o aforo.
Frías Fontes é o notario máis novo de España, tras superar as oposicións en apenas un ano e nove meses, fronte aos cinco anos de media que adoita requirir esta preparación. Durante a sesión explicará cuestións prácticas relacionadas coas decisións patrimoniais e legais que poden afectar ás familias.
No ámbito das propiedades, abordará como solucionar problemas cos datos do Catastro en Galicia e como inscribir unha finca no Rexistro da Propiedade ao menor custo posible.
Testamentos, herdanzas e poderes
A charla tamén afondará nas posibilidades que ofrece o pacto de mellora en Galicia, nas súas bonificacións fiscais e nas diferenzas entre as herdanzas con testamento e sen el.
Outro dos asuntos será a importancia de incluír determinadas cláusulas nos testamentos para evitar futuros conflitos familiares e procesos xudiciais, así como as disposicións que poden contemplarse ante unha eventual situación de divorcio.
Por último, o notario explicará que implica outorgar un poder xeral e a utilidade destes documentos nos casos de deterioración cognitiva ou demencia senil.