O paseo marítimo de Cariño estrea 36 bancos e 40 papeleiras tras a renovación do mobiliario urbano
O paseo marítimo conta estes días cunha renovación do seu mobiliario urbano coa instalación de novos bancos e papeleiras. A actuación, impulsada polo Concello, enmárcase no convenio de colaboración asinado en setembro coa Consellería de Presidencia, Xustiza e Deportes da Xunta de Galicia para o subministro de novos equipamentos.
En total, o acordo contempla a dotación de 36 bancos e 40 papeleiras, que se están incorporando ao longo deste espazo público. Con esta intervención, o goberno local busca mellorar a comodidade das persoas que utilizan o paseo, facilitar o mantemento e a limpeza da contorna e renovar a imaxe dunha das zonas de encontro e convivencia da veciñanza.
A actuación forma parte dos traballos municipais destinados á mellora dos espazos públicos e dos equipamentos urbanos. A renovación dos bancos e das papeleiras permitirá actualizar elementos de uso cotián e ofrecer unhas instalacións máis funcionais ás persoas residentes e visitantes.
Ademais, o Concello avanzou que está prevista a sinatura dun segundo convenio coa Administración autonómica. Este novo acordo permitirá completar a intervención actual e continuar coa renovación do mobiliario urbano noutros puntos do municipio.
O goberno local agradeceu a colaboración da Xunta de Galicia e o seu apoio a iniciativas destinadas a mellorar os espazos públicos e a calidade de vida da veciñanza.