O respaldo do Goberno reforza a candidatura do Xeoparque Cabo Ortegal para revalidar o selo da UNESCO
O Xeoparque Mundial da UNESCO Cabo Ortegal deu un novo paso no proceso para revalidar o seu recoñecemento internacional coa celebración en Cariño do acto institucional da candidatura. No encontro participou o subdelegado do Goberno na Coruña, Julio Abalde, quen trasladou o apoio do Executivo central á protección, posta en valor e promoción do patrimonio natural deste territorio.
Durante a súa intervención, Abalde subliñou que a continuidade do selo da UNESCO representa unha oportunidade para consolidar un modelo de desenvolvemento sustentable que compatibiliza a conservación do espazo natural coa dinamización económica e social dos municipios que integran o xeoparque.
O Xeoparque Mundial da UNESCO Cabo Ortegal abrangue os concellos de Cariño, Cedeira, Cerdido, Moeche, Ortigueira, San Sadurniño e Valdoviño. Este territorio destaca polo seu excepcional patrimonio xeolóxico, considerado un dos máis singulares de Europa pola presenza de rochas de máis de 1.000 millóns de anos e materiais formados nas capas profundas da Terra. O recoñecemento da UNESCO avala tanto o seu valor científico como o traballo desenvolvido para compatibilizar a conservación deste patrimonio co desenvolvemento sostible, a divulgación e a promoción turística da comarca.
O subdelegado lembrou tamén o apoio económico do Goberno de España ao proxecto a través do Plan de Sustentabilidade Turística en Destino do Xeoparque Cabo Ortegal, que contou cun investimento de 1,5 millóns de euros procedentes do Plan de Recuperación, Transformación e Resiliencia.
Abalde aproveitou a súa intervención para destacar o esforzo investidor realizado polo Executivo en Galicia para avanzar cara a un modelo turístico máis sostible e dixital. Segundo indicou, nos últimos cinco anos destináronse máis de 230 millóns de euros á modernización de 43 destinos turísticos da comunidade autónoma.
Estas actuacións permitiron impulsar proxectos centrados na desestacionalización da demanda, a transformación dixital do sector, a mellora da eficiencia enerxética e a conservación do patrimonio natural e cultural, co obxectivo de fortalecer a competitividade dos destinos turísticos galegos.