Os orzamentos participativos escolares de Cedeira comparten a súa experiencia nun encontro ibérico en Santiago

A participación da comunidade educativa na toma de decisións sobre o seu propio centro foi unha das experiencias analizadas no VIII Encontro Ibérico de Orzamentos Participativos, celebrado esta semana en Santiago de Compostela. O Concello de Cedeira estivo representado polo concelleiro de Mocidade, Noel López, que explicou a evolución dun programa que se desenvolve desde 2020 e que se converteu nunha ferramenta de aprendizaxe democrática para o alumnado.
A iniciativa suma xa sete edicións e abrangue actualmente a totalidade do alumnado, profesorado e persoal non docente do IES Punta Candieira. A través deste proceso, a comunidade educativa pode participar na formulación de propostas e na elección de actuacións destinadas a mellorar o centro, adquirindo experiencia directa nos mecanismos de participación colectiva.
A participación infantil tamén chega á vida municipal
Durante a súa intervención, Noel López puxo tamén o foco no recoñecemento de Cedeira como Cidade Amiga da Infancia de Unicef e no funcionamento do Consello Local de Infancia e Adolescencia (CLIA) Ondiñas na Vila.
Este órgano permite que nenos, nenas e adolescentes trasladen as súas inquedanzas e propostas á Administración local. De feito, algunhas das iniciativas xurdidas neste espazo xa se materializaron, demostrando a capacidade da infancia e da adolescencia para contribuír ás decisións que afectan ao municipio.
A experiencia presentada no encontro amosa así a importancia de incorporar a participación desde as primeiras etapas educativas, fomentando valores como o diálogo, a corresponsabilidade e o compromiso coa contorna.
Intercambio de iniciativas con outras administracións e universidades
Na mesa redonda participaron tamén a politóloga Maica Freire, coordinadora dos diferentes proxectos desenvolvidos en Cedeira; a concelleira de Cartagena Ángeles Alemán, e Antonio Fragoso, vicerreitor da Universidade do Algarve.
O encontro serviu para poñer en común diferentes modelos de orzamentos participativos e analizar o seu potencial como ferramenta de formación cidadá, especialmente entre a poboación máis nova.