Os sindicatos ameazan con manter as protestas no transporte de mercadorías da provincia da Coruña se non se retoma a negociación
Os sindicatos CCOO, UGT e CIG volveron mobilizarse este xoves no sector do transporte de mercadorías por estrada da provincia da Coruña para esixir á patronal que desbloquee a negociación do convenio colectivo. A concentración celebrouse no polígono industrial de Río do Pozo, en Narón, e dá continuidade ás protestas desenvolvidas previamente en Santiago de Compostela e A Coruña.
As organizacións sindicais advirten de que as mobilizacións continuarán se as empresas non retoman as conversas e non mostran disposición a avanzar nas reivindicacións dos traballadores.
Entre as principais demandas figuran subas salariais que permitan recuperar o poder adquisitivo perdido nos últimos anos, así como melloras na xornada laboral e na remuneración dos distintos tempos de traballo. Desde CCOO cifran nun 15 % a diferenza acumulada entre a evolución dos salarios e a inflación durante os últimos trece anos.
Un convenio pendente de avances
En 2025, os sindicatos conseguiron un incremento salarial do 4 % e que as pagas extraordinarias pasasen de 25 a 30 días. O obxectivo era pechar daquela un acordo que permitise retomar en 2026 a negociación dun convenio plurianual, no que se abordasen os salarios, a xornada e outras condicións laborais.
Porén, as reunións mantidas coa representación empresarial non deron os resultados esperados. Segundo os sindicatos, a negociación permanece bloqueada porque a patronal non acepta as propostas presentadas, que consideran necesarias para adaptar o convenio á realidade actual do sector.
Ante esta situación, CCOO, UGT e CIG insisten en que a solución pasa por volver sentar ambas as partes á mesa de negociación e avanzar cara a un acordo que responda ás demandas dos traballadores.