Pantín sobe de categoría e prepárase para recibir a elite do surf internacional
A praia de Pantín volverá ser durante nove días un dos grandes puntos de encontro do surf internacional. Do 22 ao 30 de agosto, Valdoviño acollerá unha nova edición do ABANCA Pantín Classic Galicia Pro, que este ano dá un importante salto deportivo coa súa incorporación á categoría QS 6000 da World Surf League (WSL).
A competición reunirá preto de 250 surfistas, cunha presenza internacional que rondará o 80 %, consolidando o campionato como unha das principais citas deportivas do verán en Galicia. A proba principal desenvolverase entre o 25 e o 30 de agosto, mentres que os días 22 e 23 estarán dedicados ao surf adaptado e o día 24 celebraranse os Trials e Wildcards.
O cambio de categoría supón un novo impulso para un campionato que leva décadas situando Pantín no calendario internacional do surf. A edición de 2026 permitirá aos participantes competir por puntos importantes dentro do circuíto Qualifying Series e volverá reunir na praia de Valdoviño deportistas procedentes de diferentes países.
Pero o Pantín Classic será moito máis que competición. Ao longo dos nove días haberá música, exhibicións de skate, actividades deportivas, propostas para familias e diferentes iniciativas de ocio e concienciación ambiental, convertendo a praia nun punto de encontro tamén para o público que se achegue a desfrutar do ambiente do campionato.
Con esta nova edición, o Pantín Classic reforza ademais o seu papel como escaparate turístico de Valdoviño e Ferrolterra, aproveitando a repercusión internacional do evento para promocionar a praia, o territorio e a súa vinculación co mundo do surf.