Concello

A iniciativa 'Saberes e lembranzas' combinará natureza, actividade física e memoria con dúas pequenas rutas o xoves 20 de agosto

Recuperar coñecementos que forman parte da memoria popular e redescubrir as plantas e árbores da contorna será o obxectivo de 'Saberes e lembranzas', unha nova actividade dirixida ás persoas maiores de 60 anos que se desenvolverá o próximo xoves 20 de agosto.

A proposta, gratuíta e con prazas limitadas, combinará un paseo pola natureza con exercicio físico e reminiscencia, buscando que os participantes recuperen recordos relacionados coas plantas habituais da zona e cos usos que tradicionalmente se lles daban.

A actividade estará guiada polo educador ambiental Xavier Pujol, que acompañará aos participantes durante dous pequenos percorridos didácticos nos que poderán identificar herbas, plantas e árbores da contorna e coñecer ou lembrar algunhas das súas propiedades e usos tradicionais.

Dúas rutas pola mañá

A primeira das camiñadas terá lugar ás 10.30 horas, con saída desde o local social de Viladonelle.

A segunda comezará ás 12.00 horas, neste caso desde o adro da igrexa de Santa María.

A iniciativa está concibida tamén como un espazo para compartir coñecementos entre os propios participantes. A intención é tirar do fío dos recordos e poñer en común aqueles saberes sobre botánica que foron pasando de xeración en xeración e que, co paso do tempo, poden quedar esquecidos.

Inscrición aberta ata o martes 18

As persoas interesadas en participar deberán formalizar a súa inscrición antes do martes 18 de agosto.

Para anotarse poden acudir presencialmente á biblioteca municipal ou contactar co teléfono 981 390 233.

Ao tratarse dunha actividade con prazas limitadas, será necesario realizar a inscrición previa para poder participar.