Valdoviño aproba destinar máis de 250.000 euros a cultura e deporte entre críticas da oposición
O pleno da corporación municipal de Valdoviño aprobou este mércores destinar algo máis de 250.000 euros do POS+Adicional da Deputación da Coruña a gastos correntes relacionados coas actividades culturais e deportivas. A proposta, único punto da orde do día da sesión extraordinaria, saíu adiante cos votos favorables do PSOE e do BNG e a abstención do PP.
Segundo informou o Concello, os fondos permitirán cubrir gastos derivados de actividades culturais e deportivas no municipio. Porén, a aprobación da partida xerou críticas por parte dos grupos da oposición, que cuestionan a falta de información detallada sobre o destino concreto dos cartos.
O Partido Popular de Valdoviño explicou que se abstivo ao considerar que o goberno local non aclarou a que actividades de 2026 se destinarán os máis de 250.000 euros, unha cantidade que se suma ás partidas xa previstas no orzamento municipal. A formación asegura que foi convocada de maneira extraordinaria para a sesión sen recibir información suficiente sobre o destino final dos fondos.
Os populares tamén relacionan esta situación co acontecido en novembro de 2025, cando, segundo denuncian, o alcalde aprobou mediante decretos gastos por valor de 120.000 euros para actividades encargadas á empresa Goodlife. O PP afirma que esas actuacións contaron con reparos suspensivos da Intervención Municipal e que se realizaron sen procedemento de contratación. A formación reclama que as propostas sometidas a votación estean claramente definidas e por escrito.
Pola súa banda, TEGA Valdoviño tamén cuestionou a falta de información sobre a distribución dos fondos. A formación preguntou que aconteceu co diñeiro que xa estaba destinado a cultura e deporte, por que é necesario mobilizar agora máis de 250.000 euros e que cantidade se asignará finalmente a cada área.
TEGA criticou que o PSOE e o BNG votasen a favor da proposta e reclamou un desglose detallado dos gastos. Ademais, reiterou a súa petición de dimisión do alcalde e do concelleiro de Deportes, ao considerar que a xestión dos fondos públicos debe ir acompañada de explicacións e responsabilidades políticas.
Así, malia que a partida quedou aprobada, os grupos da oposición reclaman máis transparencia sobre o destino concreto dos cartos. A información difundida polo Concello non detalla, polo momento, as cantidades que se dedicarán a cada área nin as actividades específicas que se financiarán.