Valdoviño limita o tráfico en Pantín para evitar colapsos durante os días clave do Pantín Classic
A elevada afluencia de visitantes prevista durante os días centrais do ABANCA Pantín Classic Galicia Pro levará a Valdoviño a aplicar desde este xoves, 27 de agosto, un dispositivo especial de tráfico na contorna da praia de Pantín. O obxectivo é mellorar a mobilidade e evitar retencións e colapsos circulatorios durante a recta final dunha competición que este ano reúne a preto de 250 surfistas de máis dunha vintena de países.
As medidas estarán activas ata o domingo 30 de agosto e establecen diferentes sentidos únicos nas vías de acceso e saída da zona. A regulación afectará especialmente aos desprazamentos cara aos principais puntos de concentración de visitantes durante o campionato.
Entre as modificacións previstas atópase o establecemento de sentido único cara a O Ariño no tramo comprendido entre a igrexa de Pantín e O Ariño. Tamén haberá circulación en sentido Beceiros entre O Ariño e Beceiros e en sentido O Rodo entre O Ariño e O Rodo.
Así mesmo, establecerase sentido único cara a As Traves entre As Traves e O Freixo, mentres que outro dos itinerarios quedará regulado en sentido O Cotellón, entre este núcleo e O Freixo.
Cambios no acceso desde Marnela de Arriba
O dispositivo tamén contempla modificacións no acceso desde Marnela de Arriba ata O Rodo. Neste tramo permitirase a circulación en ambos os sentidos ata o cruzamento coa estrada da costa.
A partir dese punto, quedará prohibido continuar cara á zona de O Ariño, unha medida destinada a facilitar a distribución do tráfico e evitar que a elevada chegada de vehículos termine bloqueando os accesos.
O Concello recomenda a quen se desprace ata Pantín durante estes días que preste especial atención á sinalización e ás indicacións establecidas no dispositivo especial.
Restricións para vehículos de gran tamaño
O bando municipal inclúe ademais unha limitación específica para os vehículos de maior tamaño. Durante os días de aplicación das medidas, entre as 10.00 e as 22.00 horas, quedará prohibida a circulación polas vías afectadas aos vehículos cuxa lonxitude máxima autorizada supere os sete metros.
A regulación busca garantir que as estradas da contorna poidan absorber o incremento de tráfico asociado ao campionato e manter unhas condicións adecuadas de seguridade e circulación.
O Pantín Classic afronta así as súas xornadas de maior actividade despois de que a competición principal tivese que atrasar o seu comezo debido á falta de condicións adecuadas no mar. A edición de 2026 supón ademais un salto deportivo para a cita de Valdoviño, que se incorpora á categoría QS 6000 da World Surf League.
O evento prolongarase ata o 30 de agosto e, ademais da competición deportiva, mantén unha ampla programación paralela con actividades musicais, gastronómicas, medioambientais e propostas dirixidas ao público. O Concello calcula que o Pantín Classic pode reunir arredor de 100.000 visitantes durante as súas diferentes xornadas.