A Coral Polifónica Eixil dará hoxe o pregón das Festas da Patroa, que encherán Cedeira de actividade durante sete días
As Festas da Patroa de Cedeira arrancan hoxe, martes 11 de agosto, cunha programación que se prolongará durante sete días e que combinará música, tradición, espectáculos e actividades para todos os públicos. Entre as citas máis singulares desta edición estará a eclipse total de Sol de mañá, mércores 12, que coincidirá cunha sesión especial de Jazz de Ría no miradoiro de San Antón de Corveiro.
O inicio oficial terá lugar ás 20:00 horas na praza do Concello, co pregón da Coral Polifónica Eixil, unha entidade cunha traxectoria de máis de cinco décadas. A música estará tamén presente no acto coa participación da agrupación de folclore galego Buxainas. A primeira noite das festas continuará a partir das 22:30 horas na praza Roxa co tradicional Entroido de Verán e a Festa da Escuma, coa música da Discomóbil CDC.
A xornada do mércores estará marcada polo fenómeno astronómico. Jazz de Ría aproveitará a eclipse para ofrecer unha proposta especialmente singular desde San Antón de Corveiro, con DJMIL a partir das 19:00 horas e a actuación posterior de Xabier Díaz, acompañado por Iván Costa, Roberto Grandal e Guillermo Guerrero. O acceso ao miradoiro será a pé ou mediante os autobuses lanzadeira habilitados polo festival desde o Paseo Arriba da Ponte.
O xoves chegará outra das citas máis participativas das festas, os Xogos Populares, que se celebrarán desde as 17:30 horas no Paseo da Mariña e repartirán 1.000 euros en premios entre os equipos gañadores. A programación continuará con propostas culturais e musicais ao longo da xornada, dentro dun calendario festivo que manterá durante os seguintes días as actividades familiares, concertos, verbenas e citas tradicionais.
A programación completa das Festas da Patroa 2026, con todos os horarios, localizacións e actividades previstas, pode consultarse neste enlace.