A literatura toma protagonismo en Ares coa presentación de 'Relatos que aún no me había atrevido a escribir'
A Alianza Aresana será escenario este xoves, 6 de agosto, ás 20.00 horas, da presentación de Relatos que aún no me había atrevido a escribir, o novo libro da escritora Anna Agustí Farré. O acto está organizado polo Concello de Ares a través da Concellaría de Cultura e forma parte da programación cultural do municipio.
Durante o encontro, a autora ofrecerá unha visión persoal sobre o proceso de creación da obra e afondará nas historias, vivencias e reflexións que recolle neste volume. A cita permitirá ao público achegarse á súa traxectoria literaria e coñecer de primeira man os detalles que deron forma ao libro.
A presentación celebrarase no salón de actos da Alianza Aresana e contará con entrada libre ata completar a capacidade do recinto. O Concello anima á veciñanza e ás persoas afeccionadas á lectura a participar nesta actividade, que busca fomentar o encontro entre autores e lectores e promover a cultura no municipio.