A Senda das Ánimas de Neda supera as 400 inscricións para a súa edición deste sábado
A Senda das Ánimas volverá percorrer este sábado, 31 de outubro, a rúa Real de Neda cunha proposta renovada que xa espertou un notable interese: máis de 400 persoas inscribíronse para participar na actividade. O prazo para anotarse permanecerá aberto na biblioteca municipal ata última hora deste venres.
O percorrido, pensado especialmente para o público infantil e xuvenil, manterá as escenas teatralizadas que caracterizan esta cita, pero incorporará este ano novas probas a modo de xincana. Os participantes deberán superar os diferentes retos para avanzar polo itinerario, que contará tamén cun túnel do terror e cunha decoración especial ao longo da céntrica rúa.
A experiencia está aberta tanto aos nenos e nenas de Neda e doutros puntos da comarca, que poderán participar acompañados de persoas adultas, como á mocidade. Para evitar aglomeracións e garantir o desenvolvemento da actividade en condicións de seguridade, organizaranse máis dunha vintena de pases consecutivos, cun máximo de 20 persoas en cada quenda.
A Senda das Ánimas desenvolverase entre as 19.00 e as 21.00 horas. A elevada cifra de inscricións anticipa unha tarde de gran participación nunha das propostas de lecer vinculadas á celebración do Samaín.
Cortes de tráfico na rúa Real
A preparación e celebración da actividade implicarán restricións á circulación e ao estacionamento. O Concello prohibirá o tráfico rodado e aparcamento no tramo da rúa Real comprendido entre a confluencia coa rúa do Castro e a travesía de Sobre a Vila, xunto á Casa do Concello.
Ademais, entre as 18.00 e as 22.00 horas, as limitacións á circulación estenderanse tamén ao tramo inmediato á Casa Consistorial e á rúa Sobre a Vila. As medidas buscan facilitar a montaxe e o desenvolvemento da actividade.
O magosto completará a xornada
A programación do sábado incluirá tamén o tradicional magosto veciñal, organizado polo Concello e aberto a toda a cidadanía. A celebración terá lugar na Casa das Palmeiras e na súa contorna, onde se poderán degustar castañas asadas e boliños preñados, acompañados de animación musical.
Deste xeito, Neda reunirá nunha mesma tarde dúas propostas para diferentes públicos: unha experiencia de terror e probas pola rúa Real e unha celebración gastronómica e musical arredor do magosto.