A UDC conmemora os 25 anos da primeira promoción de Podoloxía e os 26 da súa Clínica Universitaria
A Universidade da Coruña (UDC) conmemorou este venres en Ferrol o 25 aniversario da primeira promoción de titulados e tituladas en Podoloxía e os 26 anos de traxectoria da Clínica Universitaria de Podoloxía. A celebración, organizada pola Facultade de Enfermaría e Podoloxía con motivo do Día Internacional da Podoloxía, reuniu no Hospital Naval a profesionais do sector, persoal docente, alumnado e pacientes.
A xornada desenvolveuse baixo o lema '25 anos de vocación, docencia e servizo á sociedade' e formou parte do programa XII Outubro UDC Saudable. Durante o encontro repasáronse as orixes da titulación, a evolución da clínica universitaria e os retos aos que se enfronta actualmente a profesión.
Na apertura, a vicerreitora do Campus de Ferrol, Igualdade e Responsabilidade Social, Ana Ares Pernas, destacou o percorrido da Podoloxía na UDC e o compromiso coa formación e coa excelencia profesional. Segundo sinalou, tanto a titulación como a clínica convertéronse en espazos de formación, innovación e atención á sociedade cunha importante pegada na comarca.
Pola súa banda, o decano da Facultade de Enfermaría e Podoloxía, Pedro Gil Manso, lembrou que a primeira promoción tivo que defender a consideración da Podoloxía como titulación universitaria. Agora, explicou, o reto pasa por conseguir que estes profesionais se incorporen de maneira normalizada ao sistema público de saúde, ao igual que acontece con outras profesións sanitarias.
Gil Manso tamén puxo en valor a Clínica Universitaria de Podoloxía, situada no Hospital Naval, como un recurso singular no ámbito universitario español, ao combinar a asistencia gratuíta, a actividade docente e a súa localización en instalacións do sistema público de saúde.
Un momento relevante para a Podoloxía galega
A presidenta do Colexio Oficial de Podoloxía de Galicia, Ana María Requeijo Constenla, aproveitou a celebración para destacar o momento que atravesa actualmente a profesión. A recente decisión de incorporar profesionais da Podoloxía aos equipos de Atención Primaria do Sergas supón, segundo sinalou, un avance no recoñecemento do papel desta disciplina na prevención e na atención sanitaria.
Tamén participou a xerenta da Área Sanitaria de Ferrol, María Fernanda López Crecente, quen salientou a colaboración entre a área sanitaria e a Facultade de Enfermaría e Podoloxía. Esta cooperación permite ampliar os espazos de formación práctica e ofrecer ao alumnado novas oportunidades para coñecer de preto a realidade asistencial.
A concelleira de Educación, Universidade e Política Lingüística, Patricia Cons Formoso, defendeu pola súa parte a continuidade do traballo conxunto para consolidar Ferrol como un referente galego na formación e atención relacionada coa saúde do pé.
Unha xornada para mirar ao pasado e ao futuro
O programa incluíu dúas mesas redondas nas que participaron persoas vinculadas á historia e á actualidade da titulación e da Clínica Universitaria de Podoloxía.
A primeira estivo dedicada ás orixes da titulación e da clínica e contou coa participación de Nuria Esther Varela Feal, Julia María Janeiro Arocas e Francisco Alonso Tajes, responsables de diferentes etapas iniciais da Escola Universitaria de Enfermaría e Podoloxía, da titulación e da clínica. A visión do alumnado e das persoas usuarias completouse coas intervencións de María Dolores Martínez Rodríguez, integrante da primeira promoción de diplomados e diplomadas en Podoloxía, e da paciente Pilar Pazos Casal.
A segunda mesa centrouse na situación actual da titulación e da clínica. Nela participaron Pedro Gil Manso, Carolina Rosende Bautista e Raquel Veiga Seijo, xunto ao presidente da Asociación Galega de Estudantes de Podoloxía, Lois Vázquez Campos, e ao presidente da Asociación de Diabéticos de Ferrolterra, José Manuel García Romero.
A celebración rematou co descubrimento dunha placa conmemorativa nas instalacións da Clínica Universitaria de Podoloxía do Hospital Naval. O elemento queda como lembranza de máis de 25 anos de actividade vinculada á formación universitaria, á asistencia e ao servizo á sociedade desde Ferrol.