A Xunta destina 15 millóns á UDC para impulsar a investigación e construír un novo edificio en Ferrol

FerrolXa
O futuro Edificio de Investigación e Innovación da Industria Intelixente contará con 13 laboratorios e espazo para 175 investigadores; a súa finalización está prevista para finais de 2029
FERROL convenio udc xunta
12 Nov 2026

A Universidade da Coruña (UDC) recibirá preto de 15 millóns de euros da Xunta para reforzar os seus recursos científicos e desenvolver novas infraestruturas de investigación, cun investimento destacado no Campus Industrial de Ferrol. O conselleiro de Educación, Ciencia, Universidades e FP, Román Rodríguez, e o reitor da UDC, Ricardo Cao, asinaron este xoves tres acordos de colaboración para financiar estas actuacións, nun acto ao que tamén asistiu o alcalde ferrolán, José Manuel Rey.

A principal partida, de 13,1 millóns de euros, destinarase ao novo Edificio de Investigación e Innovación da Industria Intelixente (EI3), unha infraestrutura concibida para impulsar a investigación aplicada e a transferencia de coñecemento entre a universidade e o tecido empresarial. O proxecto prevé estar rematado a finais de 2029 e contará con espazos flexibles e modulares destinados á investigación, á docencia e ao desenvolvemento de proxectos colaborativos.

O edificio estará especializado en ámbitos estratéxicos para o Campus Industrial de Ferrol, como a enxeñaría naval e offshore, a robótica, a xestión de procesos industriais e o hidróxeno verde aplicado ao sector marítimo. Unha vez rematadas as obras, está previsto trasladar alí as instalacións do Centro de Investigación en Tecnoloxías Navais e Industriais (CITENI) e do Centro Mixto de Investigación UDC-Navantia (CEMI). A integración reunirá 13 laboratorios e arredor de 175 investigadores, ademais de incorporar equipamento avanzado para traballar en materiais, enerxía, fabricación avanzada, láseres, polímeros, robótica, química e radioactividade.

Máis equipamento científico e tecnolóxico

O segundo dos convenios contempla un investimento de 1,86 millóns de euros para renovar os recursos destinados á formación universitaria e mellorar os equipos científico-técnicos dos centros de investigación da UDC. Entre os beneficiarios figuran centros de excelencia da Rede CIGUS e centros colaborativos, que incorporarán desde simuladores clínicos e microscopios ata instrumentación científica, equipos de ensaio e maquinaria de precisión.

O acordo permitirá mellorar tamén as capacidades do Centro Interdisciplinar de Química e Bioloxía (CICA), especialmente en investigación química, materiais, biomedicina e ciencias da vida, así como as do Centro de Investigación en Tecnoloxías da Información e as Comunicacións (CITIC), que reforzará os seus recursos de computación cuántica, servidores, tarxetas gráficas de altas prestacións e sistemas de almacenamento.

Pola súa banda, o Centro de Innovación Tecnolóxica en Edificación e Enxeñaría Civil (CITEEC) disporá de novos instrumentos para caracterizar materiais, medir caudais e a calidade da auga, realizar ensaios e incorporar impresión 3D, ademais de modernizar os sistemas de control e automatización dos seus laboratorios.

O financiamento inclúe tamén a mellora dos recursos docentes do Campus Industrial de Ferrol, con simuladores clínicos, microscopios e equipos de experimentación, así como novas ferramentas dixitais e recursos para reforzar a xestión académica.

Con estas actuacións, a Xunta e a UDC buscan fortalecer a investigación, a innovación e a colaboración co sector produtivo, co novo edificio EI3 como unha das principais infraestruturas deste impulso en Ferrol.

0.19142889976501