As lendas toman Pontedeume cun novo festival literario para celebrar o Samaín
As historias de misterio, fantasía e terror tomarán Pontedeume durante a celebración do Samaín. Do 30 de outubro ao 1 de novembro, a vila acollerá a primeira edición de 'Vila das Lendas', un novo festival literario que nace coa intención de recuperar, divulgar e poñer en valor o patrimonio de tradición oral galega.
A proposta recolle a testemuña do festival Vila do Libro e dá un novo enfoque a aquela iniciativa, nesta ocasión arredor das lendas, os relatos populares e o imaxinario asociado ao Samaín. A literatura será o fío condutor dunha programación que combinará creación contemporánea e tradición.
Durante tres días, o público poderá participar en encontros con escritores e escritoras, mesas de debate, representacións escénicas e obradoiros, nunha programación pensada para achegar as lendas galegas a diferentes públicos e reivindicar o seu valor como parte da cultura e da memoria colectiva.
A contorna terá tamén un papel destacado no festival. O Torreón dos Andrade, as Fragas do Eume e o Mosteiro de Caaveiro estarán ligados a unha programación que pretende aproveitar o patrimonio histórico e natural da zona para crear unha atmosfera especialmente relacionada co misterio e coas historias transmitidas ao longo das xeracións.
O programa completo aínda está pendente de presentación. Nos próximos días daranse a coñecer as actividades concretas e as voces convidadas que participarán nesta primeira edición de 'Vila das Lendas'.
A iniciativa pretende converter así a ponte de Todos os Santos nunha oportunidade para achegarse á literatura desde unha perspectiva diferente, recuperando historias, lendas e personaxes do imaxinario galego e vinculándoos aos espazos patrimoniais da contorna.