As Rías Baixas, destino da nova excursión organizada pola Asociación de Veciños de Seixas
A Asociación de Veciños de Seixas, coa colaboración do Concello das Somozas, organiza unha nova viaxe cultural e de lecer ás Rías Baixas, unha proposta aberta a toda a veciñanza que se celebrará o vindeiro sábado 12 de setembro.
A saída está prevista para as 7.45 horas desde a Escola de Seixas. Ao longo da xornada, as persoas participantes percorrerán algúns dos enclaves máis representativos da costa pontevedresa.
O primeiro destino será O Grove, unha das vilas mariñeiras máis coñecidas de Galicia, onde os asistentes poderán coñecer o seu ambiente costeiro e a súa tradición pesqueira. Posteriormente, a excursión continuará cara á Illa da Toxa, recoñecida polas súas augas termais e pola emblemática capela revestida con cunchas de vieira.
A última parada será en Cambados, considerada a capital do albariño e un dos principais referentes do enoturismo galego, onde os visitantes poderán pasear polo seu casco histórico e descubrir o seu patrimonio e a súa tradición vitivinícola.
O prezo da excursión é de 25 euros para as persoas socias da Asociación de Veciños de Seixas e de 35 euros para as non socias. A tarifa inclúe o desprazamento en autobús e as dietas da xornada.
As inscricións poden realizarse chamando ao teléfono 619 87 82 22. O prazo para anotarse permanecerá aberto ata o 1 de setembro. As prazas son limitadas e as persoas socias terán preferencia na reserva.