As Somozas recupera os labores tradicionais do campo coa sétima Malla no Seixidal
As Somozas celebrou unha nova edición da Malla no Seixidal, unha xornada dedicada a recuperar e poñer en valor os antigos labores do campo galego. O evento, organizado polo Concello de As Somozas, alcanzou este ano a súa sétima edición.
A actividade permitiu recrear o proceso tradicional da malla, un labor que durante décadas formou parte da vida cotiá das zonas rurais e que requiría do traballo conxunto de numerosos veciños.
Durante a xornada, diferentes expertos realizaron a malla tradicional empregando maquinaria antiga e reproducindo o proceso de bater os cereais para separar o gran da palla. Unha vez recollido, este destinábase posteriormente á elaboración de fariña.
A iniciativa busca manter viva a memoria destes labores e achegar ás novas xeracións unhas formas de traballo que foron fundamentais na economía e na vida social do campo galego.
A celebración contou tamén coa presenza da delegada territorial da Xunta en Ferrol, Martina Aneiros, que asistiu a esta sétima edición da Malla no Seixidal.